މާލޭ ސިޓީ ކައުންސިލުން ވިދާޅުވީ މާލޭގެ މިސްކިތަކުގައި ކެމެރާ ހަރުކުރަން ނިންމީ މިސްކިތްތައް ރަނގަޅަށް ބަލަހައްޓައި އެތަންތަނަކީ އެކި ފާޑުފާޑުގެ ކުށްތަކާއި ޖަރީމާ ހިންގާ ތަނަކަށް ވިޔަނުދީ މިސްކިތްތަކުގެ ގަދަރާއި ކަރާމާތް ހިފަހެއްޓުމުގެ ގޮތުންނެވެ.
ކައުންސިލުން ނިންމާފައިވަނީ މާލޭގެ ހުރިހާ މިސްކިތެއް އެއް ސީސީޓީވީ ނެޓްވޯކަކުން ގުޅާލާ، ހުރިހާ ކެމެރާއެއް ސިޓީ ކައުންސިލުން މޮނިޓާ ކުރެވޭ ކަހަލަ ނިޒާމެއް ގާއިމު ކުރުމަށެވެ. މިކަމުގައި ކުރަން ޖެހޭ ސާވޭތައް ވެސް މިހާރުކޮށްފައިވާ ކަމަށް ސިޓީ ކައުންސިލުން މައުލޫމާތު ދެއްވައެވެ.
ކޮވިޑް19 އާއި ގުޅިގެން މިސްކިތްތަކުގެ ޖަމާއަތް މެދުކަނޑާލުމުން އެތަންތަނުގައި މަސްތުވާތަކެތި ބޭނުންކުރާ މީހުން ތިބޭ ކަމުގެ މައްސަލަ ވަނީ ވަރަށް ބޮޑަށް ފެންމަތިވެފައެވެ. އެގޮތުން އާއްމުންގެ ބަޔަކު ނިކުމެ މަސްތުވެގެން ތިބި ބަޔަކު މިސްކިތްތަކުގެ ނެރެ ފުލުހުންނާއި ހަވާލުވެސް ކޮށްފައިވެއެވެ. މީގެ އިތުރުން ރާއްޖޭގެ މިސްކިތެއްގައި އެހެން ދީނެއްގެ އަޅުކަމެއް ކުރަން އިން މީހެއްގެ ފޮޓޯ ވެސް މީގެ ދުވަސް ކޮޅެއް ކުރިން ވަނީ އާއްމު ވެފައެވެ،
