ރައީސް ނަޝީދު މިހެން ވިދާޅުވީ، ޔޫތު މިނިސްޓަރު އަހްމަދު މަހްލޫފްގެ މައްޗަށް ކުރެވޭ ކޮރަޕްޝަންގެ މައްސަލައިގައި ކޯޓަށް ފޮނުވައިފިނަމަ، ދައުލަތް "އޮރިޔާން ވާނެ" ކަމަށް މިނިސްޓަރު މަހުލޫފް ވިދާޅުވުމާއި ގުޅިގެން އެކަމަށް ރައްދުދެއްވައި އެމްޑީޕީގެ ގައުމީ މަޖިލީހުގެ ވަޓްސްއެޕް ގުރޫޕަށް ފޮނުއްވެވި މެސެޖެއްގައެވެ.
އެކަމަށް ރައްދުދެއްވާ ރައީސް ނަޝީދު ވިދާޅުވީ، ރައީސް ޔާމީންއަށް އެކަނި ދައުވާކޮށްފަ ނިންމާލުމަކީ ވަރަށް ހުތުރު ކަމެއް ކަމަށާއި، އެޔަށްވުރެ ބޮޑަށް ދައުލަތް "އޮރިޔާން ވާނެ" އެހެން ކަމެއް ނެތް ކަމަށެވެ. އެމްއެމްޕީއާރްސީ މައްސަލާގައި ދައުވާތައް ނުކުރެވޭ އެއްވެސް ސަަބަބެއް އޮވެގެން ނުވާނެ ކަމަށް ރައީސް ނަޝީދު ވިދާޅުވިއެވެ.
އެމްއެމްޕީއާރްސީ މައްސަލާގައި ރައީސް ޔާމީންގެ މައްޗަށް އެކަނި ދައުވާކޮށްފަ ނިންމާލުމަކީ ހުތުރު ކަމެއް ކަމަށް ރައީސް ނަޝީދު ވިދާޅުވިއިރު، އެމްޑީޕީގެ ތެރޭގައި ޖެހިފައިވާ މައްސަލަތަކުގައި ރައީސް ނަޝީދާއި، ރައީސް ސޯލިހްގެ ގުޅުން ވަރަށް ބޮޑަށް ވަނީ ހީނަރުވެފައެވެ. އަދި މި ސަރުކާރަށް ރައީސް ނަޝީދުގެ ތާއީދު ނެތްކަން ހާމަކޮށް އެމްއެމްޕީއާރްސީ މައްސަލާގައި 5 އަަހަރުގެ ޖަލު ހުކުމެއް ތަންފީޒު ކުރަމުންދާ ރައީސް ޔާމީންއާއިއެކު ސިޔާސީ މަސައްކަތް ކުރަން ބޭނުންވާކަން ރައީސް ނަޝީދު ވަނީ ހާމަކުރައްވާފައެވެ.
ރައީސް ޔާމީންއާއިއެކު ސިޔާސީ މަސައްކަތް ކުރުމުގެ ޝައުގުވެރިކަން ފާޅުުކުރެއްވިއިރު، އެމްއެމްޕީއާރްސީ މައްސަލާގައި އެންމެ އިސް ލީޑަރަކީ ރައީސް ޔާމީން ކަމަށާއި، އެކަން ބަލާ ދައުވާތައް ކުރެވެންޖެހޭނެ ކަމަށް އެންމެ ބާރަށް ވިދާޅުވަމުންދިޔަ ބޭފުޅަކީވެސް ރައީސް ނަޝީދެވެ. އަދި އެމްއެމްޕީއާރްސީގެ ފައިސާ ބޭނުންކުރި އެންމެންނަށް ދައުވާކުރެވެންޖެހޭނެ ކަމަށްވެސް ތަކުރާރުކޮށް ރައީސް ނަޝީދު ދަނީ ވިދާޅުވަމުންނެވެ.
އެމްއެމްޕީއާރްސީ މައްސަލާގައި ސަސްެޕެންޑު ކޮށްފައިވާ މަހުލޫފް "ކްލަބް ހައުސް" މެދުވެރިކޮށް އޮންލައިން ނޫހަކަށް ދިން އިންޓަވިއުއެއްގައި ވިދާޅުވީ، އޭނާގެ މައްޗަށް އެ މައްސަލައިގައި ހަގީގަތުގައި ތުހުމަތު ވެސް ނުކުރެވޭނެ ކަމަށެވެ. މަހުލޫފް ވިދާޅުވީ މި މައްސަލައިގައި ޕީޖީ ވެސް ވަރަށް ބޮޑަށް ބައެއްގެ ޕްރެޝަރުގައި ފިތިފައިވާ ކަމަށާއި މައްސަލައަށް ނުފޫޒު ފޯރުވަނީ ކޮން ބައެއް ކަން ވެސް އެނގިވަޑައިގަންނަވާ ކަމަށެވެ. އަދި މި މައްސަލައަކީ މިހާ ދުވަސް ނަގަން ޖެހޭ މައްސަލައެއް ނޫން ކަމަށާއި މި މައްސަލަ ރަނގަޅަށް ބައްލަވައިފިނަމަ އެއް ދުވަސް ތެރޭގައި ނިމިގެންދާނެ ކަމުގެ ޔަގީންކަން މަހުލޫފް ދެއްވިއެވެ. އަދި މި މައްސަލަ ކޯޓަށް ދައުވާ ކުރަން ފޮނުވަން ނުކެރިގެން އުޅެނީ ވެސް ސާބިތުނުވާނެތީ ކަމަށާއި މައްސަލަ ކޯޓަށް ވައްދައިފިނަމަ، ނިކުންނަން ޖެހޭނީ "ދައުލަތް އޮރިޔާން ވެގެން" ކަމަށް ވަރަށް ސާބިތުކަމާއެކު މަހުލޫފް ވިދާޅުވިއެވެ.
އެމްއެމްޕީއާރުސީގެ ހިޔާނާތަކީ ފަހުގެ ތާރީހެއްގައި ދިވެހި ރާއްޖޭގައި ހިންގާފައިވާ އެންމެ ބޮޑުއެއް ހިޔާނާތެވެ. މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ އަދި ޖުޑީޝިއަރީ ކޮމިޓީގެ ޖޮއިންޓް ކޮމިޓީއިން، އެމްއެމްޕީއާރްސީ މައްސަލަ ދިރާސާކޮށް ނިންމިގޮތުގެ ރިޕޯޓާއެކު ދެ ލިސްޓެއް އާންމު ކޮށްފައިވެއެވެ.
އެއީ، އެމްއެމްޕީއާރުސީ މެދުވެރިކޮށް ހިންގާފައިވާ ވަށްކަމާއި ހިޔާނާތުގެ މައްސަލައިގައި ބައިވެރިވި ނުވަތަ އެކަމުން މަންފާ ލިބުނު ކަމަށް ތުހުމަތު ކުރެވޭ 281 މީހެއް ހިމެނެ ލިސްޓަކާއި، މި މައްސަލައިގައި ތުހުމަތު ކުރެވޭ ދައުލަތުގެ މަގާމެއް އަދާ ކޮށްފައިވާ ނުވަތަ އަދާ ކުރަމުންދާ 119 މީހުންގެ ނަންތައް ވަކިން ފާހަގަކޮށް އާންމު ކޮށްފައިވާ ލިސްޓެކެވެ.
މި ލިސްޓުގައި މިހާރުގެ ވަޒީރުން، ކުރީގެ ވަޒީރުން، މަޖިލީހުގެ ކުރީގެ މެންބަރުންނާއި މިހާރުގެ މެންބަރުންގެ އިތުރުން ބައެއް ކުންފުނިތަކާ ސުޕްރީމް ކޯޓު އަދި އެހެނިހެން ކޯޓުތަކުގެ ފަނޑިޔާރުކަން ކުރެއްވި ބޭފުޅުންގެ ނަންތައް ހިމެނެއެވެ. އަދި ސަރުކާރު ކޯލިޝަންގެ ފަރާތްތަކާއި، ކުރީ ސަރުކާރުގެ ގިނަ ފަރާތްތަކެއް މި ލިސްޓުގައި ހިމެނެއެވެ.
ނަމަވެސް ހާމައަށް ފެންނަން އޮތް ލިސްޓާއިއެކުވެސް އެ ލިސްޓުގައި ހިމެނޭ މީހުން ބުނަމުން އަންނަނީ ހިޔާނާތްތެރިވެފައި ނޯންނާނެ ކަމަށެވެ.
