ޑރ. މައުސޫމް މިހެން ވިދާޅުވީ ރޭ ފަތުރުވެރިންތަކެއް ރާއްޖެ ގެނެސް މާލެތެރެއަށް ދޫކޮަށްލުމަށްފަހު އެމީހުންނާއި ހަވާލުވެގެންތިބި މީހުން ފިލި ހާދިސާއާއި ގުޅިގެން ކުރިއްވި ޓްވީޓެއްގައެވެ.
ޑރ. މައުސޫމްގެ ޓްވީޓުގައި ވިދާޅުވީ ހިއުމަން ޓްރެފިކިން ނުވަތަ އިންސާނީ ވަގުފިޔަފާރި އާއި ޓޫރިޒަމް އެއީ ވަރަށް ތަފާތު ދެ ކަމެއް ކަމަށެވެ.
ކަމާގުޅޭ އިދާރާތަކުން ރޭ ހިނގި ހާދިސާ ބަލާ ފިއަވަޅު އަޅުއްވާނެކަމުގެ ހަބަރު ލިބުމުން ކުޑަކޮން ހިތްހަމަޖެހިއްޖެ ކަމަށް ޑރ. މައުސޫމްގެ ޓްވީޓުގައި ވިދާޅުވެފައިވެއެވެ.
ސީއެންއެމްއަށް މައުލޫމާތު ލިބިފައިވާގޮތުގަައި އެމީހުން ރާއްޖެ އައިސްފައިވަނީ ރާއްޖޭގެ ބަޔަކާއި، ބިދޭސީ ބަޔަކު ގުޅިގެން ކ. މާފުށީ ގެސްޓްހައުސްއަކަށް ބުކިން ހެދުމަށް ފަހު އެވެ.
ނަމަވެސް މާލެ ގެނެއުމަށްފަހު ހ. އޮއިވާލި އާޓް ޝޮޕް ކައިރިއަށް އެމީހުން ދޫކޮށްލުމަށް ފަހު މިހާރު އެމީހުން ގެނައި މީހުން ވަނީ ފިލާފަކަމަށް މައުލޫމާތު ލިބެއެވެ.
އިމިގްރޭޝަންގެ އޮފިޝަލަކު ސީއެންއެމްއަށް ބުނީ، އެމައްސަލަ މިހާރު ދަނީ ބަލަމުން ކަމަށެވެ.
މިކަމާއި ގުޅިގެން ފުލުހުން ބުނީ، އެފަދަ ޝަކުވާއެއް މިރޭ ހުށަހަޅާފައިވާ ކަމަށެވެ. އެ ޝަކުވާއާއި ގުޅޭ މައުލޫމާތު ކަމާ ގުޅުންހުރި އިދާރާތަކާއި ހިއްސާކޮށްފައިވާ ކަމަށާއި، އެއިދާރާތަކާއި ގުޅިގެން އެކަންކަން ހައްލުކުރުމަށް ދަނީ މަސައްކަތް ކުރަމުން ކަމަށް ފުލުހުން ބުނެއެވެ.
