މި ބައްދަލުކުރެއްވުން ބާއްވާފައި ވަނީ މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައެވެ. މި ބައްދަލުކުރެއްވުމުގައި މަޑުއްވަރީ ކައުންސިލުން ވަނީ، ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކަށް އެ ރަށު ކައުންސިލާ ބައްދަލުކޮށް މަޝްވަރާކޮށްލާނެ ފުރުސަތު ނުލިބޭތާ އަހަރުތަކެއް ވޭތުވެފައިވާކަން ފާހަގަކުރަށްވާ ދެއްވި ފުރުސަތަށް ރައީސް އަށް ޝުކުރު އަދާކުރަށްވާފައެވެ. އެހެންކަމުން ބައްދަލުކުރެއްވުމުން ދޭހަވަނީ މިސަރުކާރުން ތަރައްގީގެ ކަންކަމުގައި ބޮޑެތި އާބާދީތަކޭ އެއްގޮތަށް ކުދި އާބާދީތަކަށްވެސް ސަމާލުކަން ދެއްވާކަން ކަމަށް މަޑުއްވަރީ ކައުންސިލުން ފާހަގަ ކުރެއްވި އެވެ.
މި ބައްދަލުކުރެއްވުމުގައި ރަށުގެ ތަރައްގީ އަށް މަޑުއްވަރީ ކައުންސިލުން އެންމެ ބޭނުންވާ ކަމެއްމެއްގެ ގޮތުގައި ފާހަގަކޮށްފައިވަނީ، މަޑުއްވަރީގައި އެކަށީގެންވާ ރައްކާތެރި ބަނދަރެއް ނެތުމުގެ ދަތިކަމެވެ.
އެގޮތުން ރަށުގެ ތަރައްގީއަށް ހުރި ފުރުސަތުތަކަށް، ރަށުގައި ރައްކާތެރި ބަނދަރެއް ތަރައްގީކުރުމާ ބެހޭގޮތުންވެސް ގިނަ މަޝްވަރާތަކެއް މިއަދުގެ ބައްދަލުވުމުގައި ވަނީ ކުރެވިފައެވެ.
ބަނދަރުގެ އިތުރުން ކައުންސިލުން ވަނީ ބަނދަރާގުޅިގެން ރަށަށް ބިން އިތުރުކުރުމާއި ގިރަމުންދާ ސަރަހައްދުތައް ހިމާޔަތްކުރުމާއި ކުނިމެނޭޖްކުރުމުގައި ހުރި ދަތިތަކާއި ރަށުގެ އިހްތިސާސް ކަނޑައަޅާފައިވާ ގޮތަށް ގެންނަން ބޭނުންވާ ބަދަލުތަކާއި އަދި ކައުންސިލުގެ އިންސާނީ ވަސީލަތުގެ ދަތިކަން ފަދަ ރަށާއި ރައްޔިތުންގެ ކުރިއެރުމަށް މުހިންމުކަންކަން ފާހަގަކުރައްވާފައެވެ.
މަޑުއްވަރީ ކައުންސިލުން ފާހަގަކޮށް މަޝްވަރާކުރެވުނު ބަދަލުތައް ބަނދަރުގެ މަޝްރޫއަށް ގެނައުމާ ގުޅޭގޮތުން ސަރުކާރުގެ ކަމާބެހޭ އިދާރާތަކާއިއެކު މަޝަވަރާކުރައްވާ ގޮތެއް ނިންމަވާނެކަމަށް ރައީސް ސޯލިހު ވަނީ މި ބައްދަލުކުރެއްވުމުގައި ވިދާލުވެފައެވެ.
މަޑުއްވަރީ ކައުންސިލާ ރައީސް ސޯލިހު ބައްދަލުކުރެއްވިއިރު އެ ބައްދަލުކުރެއްވުމުގައި ދިއްގަރު ދާއިރާގެ މަޖިލިސް މެންބަރު އިކްރާމް ހަސަން ވެސް ވަނީ ބައިވެރިވެވަޑައިގެންފައެވެ.
