ދިވެހިރާއްޖޭގައި މަސައްކަތްކުރާ މީހުންނަށް އެންމެ ކުޑަމިނުން ދޭންޖެހޭނެ އުޖޫރަ ކަނޑައެޅުމަށްޓަކައި، އެންމެ ކުޑަމިނުން ދޭންޖެހޭނެ އުޖޫރައިގެ ޢަދަދާ
ގުޅޭގޮތުން، މިނިމަމް ވޭޖް އެޑްވައިޒަރީ ބޯޑުން މިނިސްޓަރަށް ލަފާ އަރުވާފައިވަނީ މިމަހުގެ ފަސް ވަނަ ދުވަހުއެވެ.
އެ ބޯޑުން އެންމެ ކުޑަ އުޖޫރަ ކަނޑައަޅާފައިވަނީ ސަރުކާރުގެ މުވައްޒަފުންނަށާއި، މެންދުފަންތީގެ ވިޔަފާރިތަކަށާއި، ބޮޑެތި ވިޔަފާރިތަކަށެވެ. މިނިމަމް ވޭޖް ބޯޑުން ކަނޑައަޅާފައިވާ އަދަދުތައް މިނިސްޓަރަށް އެރުވާތާ 30 ދުވަހުގެ ތެރޭގައި އެ އަދަދުތައް ދިރާސާ ކުރުމަށް ފަހު މިނިމަމް ވޭޖް ކަނޑައަޅާ ނުވަތަ މިނިސްޓަރު ނިންމަވާ ނިންމެވުން އާއްމު ކުރަންވާނެއެވެ.
އެ މިނިސްޓްރީން މިއަދު ބުނީ އެޑްވައިޒަރީ ބޯޑުން މިނިސްޓަރަށް އަރުވާފައިވާ އެ ލަފާ، ޤާނޫނުގެ 62 ވަނަ މާއްދާގައި ބަޔާންކުރާ ގޮތުގެ މަތިން އެ
މިނިސްޓްރީން ދިރާސާކުރަމުންގެންދާ ކަމަށާއި، އެ ދިރާސާއަށްފަހު ދިވެހިރާއްޖޭގައި މަސައްކަތްކުރާ މީހުންނަށް އެންމެ ކުޑަމިނުން ދޭންޖެހޭނެ އުޖޫރަ ކަނޑައަޅައި ޢާންމުކުރާނެ ކަމަށެވެ.
އެޑްވައިޒަރީ ބޯޑުން އެންމެ ކުޑަ އުޖޫރަ ގޮތުގައި ދޭން ލަފާ އަރުވާފައިވަނީ
- ޕްރައިވެޓް ސެކްޓަގައި، ކުދި ފަންތީގެ ވިޔަފާރިތަކަށް، 48 ގައިޑިއިރުގެ މަސައްކަތައް މަހެއްގެ މައްޗަށް 5,000 ރުފިޔާ
- ޕްރައިވެޓް ސެކްޓަގައި، މެދު ފަންތީގެ ވިޔަފާރިތަކަށް، 48 ގައިޑިއިރުގެ މަސައްކަތައް މަހެއްގެ މައްޗަށް 7000 ރުފިޔާ
- ޕްރައިވެޓް ސެކްޓަގައި، ކުދި އަދި މެދު ފަންތީގައި ނުހިމެނޭ ވިޔަފާރިތަކަށް، 48 ގައިޑިއިރުގެ މަސައްކަތައް މަހެއްގެ މައްޗަށް 8,900 ރުފިޔާ
- ޕަބްލިކް ސެކްޓަގައި، 6 ގަޑިއިރު މަސައްކަތްކުރާ ދާއިމީ މުވައްޒަފުންނަށް މަހަކަށް 7،000 ރުފިޔާ، ނުވަތަ 6
ގަޑިއިރަށްވުރެ މަދުން މަސައްކަތްކުރާ ފަރާތްތަކަށް، ގަޑިއިރަކަށް 33.65 ރުފިޔާ
ބޯޑުން ނިންމި ނިންމުމުގައި އެންމެ ދަށް އުޖޫރަ ކަނޑައަޅާފައިވަނީ ހަމައެކަނި ދިވެހިންނަށެވެ. ބިދޭސީންނަށް ދެވޭނެ އެންމެ ދަށް މުސާރަ އަދި ވަނީ ކަނޑަނާޅަ އެވެ. މީގެ އިތުރުން އެންމެ ކުދި ވިޔަފާރިތަކަށް މިނިމަމް ވޭޖެއް އަދި ކަނޑައެއް ނާޅަ އެވެ.
މިނިސްޓްރީން މިއަދު ބުނީ ބިދޭސީ މަސައްކަތްތެރިންނަށް، އެންމެ ކުޑަމިނުން ދޭންޖެހޭނެ އުޖޫރައަށް ޢަމަލުކުރަން ފެށުމަށް ޤާނޫނުގެ 62 ވަނަ މާއްދާގެ (ހ) ގައި ބަޔާންކުރާ މުއްދަތު، ޖުމްލަ ފަސް އަހަރު ދުވަހަށް އިތުރުކުރުމަށް ލަފާއެ ބޯޑުން ވަނީ ލަފާ ދީފަކަމަށެވެ.
މިއަހަރު ނިމުމުގެ ކުރިން މިނިމަމް ވޭޖު ތަންފީޒު ކުރަން ޖެހޭގޮތަށް ވަޒީފާއާ ބެހޭ ގާނޫނަށް ހުށަހެޅި އިސްލާހު މަޖިލީހުން ދާދިފަހުން ވަނީ ފާސްކޮށްފައެވެ.
އެކަމާ ގުޅޭ ބިލުގައި ވަނީ މިނިމަމް ވޭޖް 9 ދާއިރާއަކުން ކަނޑައެޅުމަށް ހިމަނާފައެވެ. އެ ދާއިރާތަކަކީ މަސްވެރިކަމާއި ދަނޑުވެރިކަމުގެ ދާއިރާ، ފަތުރުވެރިކަމުގެ ދާއިރާ، ކޮންސްޓްރަކްޝަން ދާއިރާ، ދަތުރުފަތުރުގެ ދާއިރާ، ސިއްހީ ހިދުމަތުގެ ދާއިރާ، ތައުލީމީ ހިދުމަތުގެ ދާއިރާ އާއި ކުދި އަދި މެދުފަންތީގެ ވިޔަފާރިތަކުގެ ދާއިރާ އާއި އިންފޮމޭޝަން، ކޮމިއުނިކޭޝަން އަދި ޓެކްނޮލޮޖީގެ ދާއިރާއެވެ
