މިޙަރަކާތަކީ ޑަބްލިއޫ އެޗްއޯގެ އެހީތެރިކަމާއެކު ނިލަންދޫގައި އުފެދިފައިވާ ކްލަބް ޖަމިއްޔާތަކުން މިއަހަރުގެ ހަކުރުބަލީގެ ދުވަސް ފާހަގަ ކުރުމުގެ ގޮތުން ރ.ދުވާފަރާއި ފ.ނިލަންދޫގައި ހިންގުމަށް ހަމަޖެހިފައިވާ ޙަރަކާތްތަކުގެ ތެރެއިން ކުރިޔަށް ގެންދިޔަ ޙަރަކާތެކެވެ.
ގުލްކޯ މީޓަރު ހަދިޔާ ކުރުން
ނިލަންދޫ ކްލަބް ޖަމްޢިއްޔާތަކުން އިންތިޒާމުކޮށްގެން ދުވާފަރު ޞިއްޙީ މަރުކަޒާއި ދުވާފަރު ކައުންސިލާއި ގުޅިގެން މިއަދު ހަވީރު ދުވާފަރު ޕްރީސްކޫލުގައި ކުރިޔަށް ގެންދިޔަ ހަރަކާތްތަކުގެ ތެރެއިން ފުރަތަމަކުރިޔަށް ގެންދެވިފައިވަނީ ހަކުރުބަލި ހުންނަ ފަރާތްތަކަށް ފަސޭހަކަމާއެކު ގޭގައި ތިބެގެން ޓެސްޓް ކޮށްލެވޭނެ ގުލްކޯ މީޓަރު ހަދިޔާ ކުރުމުގެ ޙަރަކާތެވެ. މިގޮތުން ހަކުރުބަލި ހުންނަ ފަރާތްތަކަށް ހަދިޔާ ކުރުމަށް 100 ގުލްކޯ މީޓަރު ދުވާފަރު ޞިއްޙީ މަރުކަޒާއި ޙަވާލު ކުރެވުނެވެ.
ގުލަކޯމީޓަރު ތަކެއް ދުވާފަރަށް ވަނީ ހަދިޔާ ކޮށްފައި
އަދި ހަކުރު ބައްޔަށް މީހުން ސްކްރީން ކުރުމަށް ބޭނުންވާ 500 ސްޓްރިޕް ދުވާފަރު ޞިއްޙީ މަރުކަޒަށް ހަދިޔާ ކުރެވިފައިވެއެވެ.
އެއަށްފަހު ހަކުރުބަލީގެ މީހުންނަށް ކޮންމެހެން އެނގެން ޖެހޭ ކަމާއި ގުޅުންހުރި މަޢުލޫމާތު ދިނުމުގެ ސެޝަނެއް ކުރިޔަށް ގެންދެވިފައިވެއެވެ. އޭގެ އިތުރުން މިރޭ ދުވާފަރު މުއައްސަސާތަކުގައި މަސައްކަތްކުރާ މުވައްޒަފުންނަށް އަމާޒުކޮށްގެންވެސް މަޢުލޫމާތު ދިނުމުގެ ސެޝަނެއްވަނީ ކުރިޔަށް ގެންދެވިފައެވެ.
މިސެޝަންތައް ކުރިޔަށް ގެންގޮސްދެއްވީ ކަމުގެ ފަންނީ ތަޖުރިބާ ލިބިވަޑައިގެން ތިއްބެވި ބޭފުޅުންނެވެ. ހަކުރު ބަލީގެ ދުވަސް ފާހަގަ ކުރުމުގެ ގޮތުން ނިލަންދޫ ސްޕޯރޓްސް ކްލަބާއި ، ޖަމްޢިއްޔަތުއް ޝަބާބު ނިލަންދޫއާއި ، ނިލަންދޫ ޔަންގް ޖެނެރޭޝަނާއި ، ސްޕަރ ޖެނެރޭޝަން ކްލަބާއި ޑޯން ޖަމްޢިއްޔާއާއި ފ.އަތޮޅު ކައުންސިލް އާއި ނިލަންދޫ ކައުންސިލް އަދި ފ.އަތޮޅު ހޮސްޕިޓަލާއި ނިލަންދޫ އަންހެނުން ތަރައްޤީއަށް މަސައްކަތް ކުރާ ކޮމެޓީ ގުޅިގެން ފ.ނިލަންދޫގައި ބޭއްވުމަށް ހަމަޖެހިފައިވާ ޙަރަކާތްތަށް ކުރިޔަށް ގެންދިއުމަށް ހަމަޖެހިފައިވަނީ މިމަހު 20 ވަނަ ދުވަހުއެވެ.
