ކައުންސިލް ރައީސް ހަސަން ވިދާޅުވީ ކޮންޓެކްޓް ވީ ކަމަށް ބުނާ މީހާއާ ޕާޓީއަކުން ދިމާވި ކަމަށާއި އެކަމަކު ދެމީހުންގެ ދެމެދުގައި 6 ފޫޓަށް ވުރެވެސް ބޮޑު ދުރުމިނެއް ހުންނާނެ ކަމަށެވެ.
"އަޅުގަނޑާ އޭނާ ދިމާވީ އޭނާގެ ފުރަގަހުން . ދެމީހުންގެ ދެމެދުގައި ހައެއްކަ ފޫޓަށް ވުރެވެސް ދުރުވާނެ " ހަސަން ވިދާޅުވިއެވެ.
އެހެން ނަމަވެސް ސީއެންއެމްއާ ވާހަކަ ދައްކަމުން ވާދޫ މީހަކު ވަނީ އޭނާ އާ ކޮންޓެކްޓްވި ކަމަށް ބުނެފައެވެ. އޭނާ ބުނީ އޭނާ އިށީނދެގެން އިން ގޮނޑިމަތީގައި އަތް ބާވައިގެން ރައީސް ހުންނެވި ކަމަށެވެ.
މައްސަލަ ޖެހުނީ ކޮންޓެކްޓްވި ލިސްޓުގައި ކައުންސިލް ރައީސްގެ ނަން ހިމެނުމާ ގުޅިގެންނެވެ.
އެރަށުން ވާހަކަ ދެއްކި އެހެން މީހަކު ބުނީ ކޮންޓެކްޓްވި މީހުންގެ ލިސްޓުން ރައީސްގެ ނަން އުނި ކުރުމަށް، ކޮންޓެކްޓް ވި މީހާގެ ބޭބެއަށް ރައީސް ގުޅުއްވާފައި ވާކަމަށެވެ. އަދި އެލިސްޓުން ނަން އުނި ކޮށްދެއްވުމަށް އެދިފައިވާ ކަމަށެވެ.
އޭނާ ބުނީ، ރައީސްގެ ހިތްހަމަ ނުޖެހުމާއެކު، ރައީސްގެ ބެލުމުގެ ދަށުގައިވާ ގެއަކުން، އެގޭގައި ކަރަންޓީނު ކޮށްފައިތިބި 5 މީހަކު ވަގުތުން ނެރެލާފައިވާ ކަމަށެވެ.
ރައީސް ހަސަން ވިދާޅުވީ ރާއްޖެ މިވަނީ މިހާރު ވަރަށް ބޮޑަށް ހުޅުވާ ލެވިފައިކަމަށާއި ވާދޫގެ 90 އިންސައްތަ މީހުނަށް ވެކްސިން ޖަހާފައި ކަމަށެވެ. އަދި މާލެއާއި ތިނަދޫ ފަދަ ބޮޑެތި އާބާދީ ތައްވެސް ވަނީ ހުޅުވާލެވިފައި ކަމަށެވެ. އެހެންކަމުން އެކަށީގެންވާ ޔަގީންކަމެއް ނެތި ހެދެމުންދާ ލިސްޓުތަކަށް ބަރޯސާވެ ދިރިއުޅުމުގެ ކަންކަން ހުއްޓުވާލުމަކީ އެންމެ ރަނގަޅު ގޮތް ނޫންކަމަށެވެ.
"މަހަށްދާމީހުން މަހަށްނުގޮސް ދަނޑަށްދާ މީހުން ދަނޑަށް ނުގޮސް އެގޮތަކަށް ނޫނެއްނޫންތޯ އޮންނަންވީ" ހަސަން ވިދާޅުވިއެވެ.
އޭނާ އިތުރަށް ވިދާޅުވީ ރަށެއްގައި އެކި ގޮތްގޮތަށް ވާހަކަ ދައްކާ ތަފާތު ހިޔާލު ތަކުގެ މީހުން އުޅޭނެ ކަމަށާއި، ކަރަންޓީނު ވާން ދެކޮޅު ހަދާ ވާހަކަ ދޮގު ކުރައްވާ ކަމަށެވެ.
ރައީސް ހަސަން މިހާރު ހުންނެވީ ކަރަންޓީނުގައެވެ. އަދި ގެއިން ނެރެލި ކަމަށް ބުނާމީހުންވެސް މިހާރު ތިބީ ކަރަންޓީނުގައި އެހެން ގެއެއްގައެވެ.
