އީ.ޕީ.އެސް. ފައުންޑޭޝަނުން އިންތިޒާމުކޮށްގެން ރޭ ބޭއްވި "ހިދުމަތުގެ ހަވީރު 2021" ހަފްލާ ޝަރަފުވެރިކޮށްދެއްވާ ވާހަކަފުޅު ދައްކަވަމުން ރައީސް ވިދާޅުވީ ގައުމެއް ތަރައްގީވެ ކުރިއަރައި ދިއުމުގައި ދަރިވަރުންނަށް ދެވޭ ތައުލީމާއެކު ދެވޭ ތަރުބިއްޔަތާއި ތަމްރީނަކީ މުޖުތަމައަށް ލޯހުޅުވުމަށް މުހިންމު ކަމެއްކަމަށެވެ.
މި ހަފްލާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ އީ.ޕީ.އެސް ސްކޫލް ފެށިގެން އައި ގޮތާއި އެ ސްކޫލުގައި ތަޢުލީމު ދިނުމުގެ ކަންކަން ކުރިޔަށްދިޔަގޮތާއި އަދި އެ ސްކޫލުގައި އެމަނިކުފާނު ކިޔަވާ ވިދާޅުވާން އުޅުއްވި ދުވަސްވަރުގެ ހަނދާން އައުކުރައްވައި އެކަންކަމުގެ މައްޗަށް ވެސް އަލިއަޅުވާލައްވައި ވާހަކަފުޅު ދައްކަވާފައެވެ.
މީގެ އިތުރުން 1960ގެ އަހަރުތަކުގެ ތެރޭގައި ރާއްޖޭގައި ތައުލީމު ފެތުރިގެން ދިޔަގޮތުގެ މައްޗަށް އަލިއަޅުވާލައްވައި ވާހަކަފުޅު ދައްކަވަމުން އެދުވަސްވަރު ރާއްޖެގައި ތިބެ އިނގިރޭސި މީޑިއަމްއަށް ކިޔެވުމުގެ ފުރުސަތު ފަހިވެގެންދިއުން އެއީ އޭގެ ފައިދާ އެތައް ރައްޔިތުންނަށް ލިބިގެންދިޔަ ރަނގަޅު ބަދަލެއް ކަމުގައި ރައީސް ވިދާޅުވިއެވެ.
ހަމަ އެހެންމެ އީ.ޕީ.އެސް ސްކޫލް ހުޅުވިގެން ދިއުމަކީ އެ ދުވަސްވަރު ތައުލީމު ހާސިލުކުރުމަށް ހާއްސަކޮށް ރަށްރަށުން އައި ދަރިވަރުންނަށް ފަހިވި ވަރަށް ރަނގަޅު ފުރުސަތެއްކަން އެމަނިކުފާނު ފާހަގަކުރެއްވިއެވެ.
މިޙަފްލާގައި ރައީސް ވަނީ އީ.ޕީ.އެސްއަށް ހިދުމަތްކުރެއްވި ބޭފުޅުންގެ ހިދުމަތުގެ އަގު ވަޒަންކުރުމުގެ ގޮތުން ދެއްވާ ހަނދާނީ ފިލާ އެފަރާތްތަކާ ހަވާލުކޮށްދެއްވާފައެވެ.
މި ހަފްލާގައި ރައީސުލްޖުމްހޫރިއްޔާގެ ނައިބު ފައިސަލް ނަސީމުވެސް ބައިވެރިވެވަޑައިގެން، އީ.ޕީ.އެސްގެ 50 އަހަރުގެ ރަން ތާރީހުގެ ދިރާސާ ވަނީ ލޯންޗުކޮށްދެއްވާފައެވެ.
އީ.ޕީ.އެސް ސްކޫލް އުފެދުމަށްފަހު ފާއިތުވި 50 އަހަރަށްވުރެ ދިގު މާޒީގައި އެ ސްކޫލުން ހަތާވީސް ހާހެއްހާ ދަރިވަރުން ތައުލީމު ވަނީ ހާސިލުކޮށްފައި އެވެ.
