ގާތްގަނޑަކަށް 11 މިލިއަން ޑޮލަރު (170 މިލިއަން ރުފިޔާ) ހަރަދު ކޮށްގެން ތަރައްގީކުރި އެއާޕޯޓް އޮޕަރޭޓްކުރާނެ ބަޔަކު އަދި ނިންމާފައެއް ނުވެއެވެ. އެހެންނަމަވެސް އައިލެންޑް އޭވިއޭޝަނާއެކު ވަނީ މަޝްވަރާ ކޮށްފައެވެ.
އައިލެންޑް އޭވިއޭޝަންގެ ޕަބްލިކް ރިލޭޝަންސް މެނޭޖަރު މޫސާ ވަސީމް ސީއެންއެމް އަށް ވިދާޅުވީ މާދަމާ ހެނދުނު މޯލްޑިވިއަންގެ ޓެސްޓް ފްލައިޓް މަޑިވަރަށް އޮޕަރޭޓް ކުރާ ގޮތަށް ހަމަޖެހިފައިވާކަމަށެވެ.
މަޑިވަރު އެއާޕޯޓު މިއަހަރު ނިމުމުގެ ކުރިން ހުޅުވަން ހުއްދަދީފައިވާކަމަށް ޓްރާންސްޕޯޓް މިނިސްޓްރީން ވަނީ ބުނެފައެވެ.
ޓެސްޓު ފްލައިޓް މާދަމާ އޮޕަރޭޓް ކުރި ނަމަވެސް، އެއާޕޯޓަށް ޝެޑިއުލް ދަތުރުތަށް ކުރަން ފަށާނީ ވާންޖެހޭ ތައްޔާރީ ތައްވެ، ސިވިލް އޭވިއޭޝަނުން ބަލަން ޖެހޭ ކަންކަން ބެލުމަށް ފަހުއެވެ.
މަޑިވަރު އެއާޕޯޓު 1.2 ކިލޯމީޓަރުގެ ރަންވޭއަކާ އެކު ތަރައްގީކޮށްފައިވާ އެއާޕޯޓެކެވެ. އެއެއާޕޯޓުގެ ޓާމިނަލް އިމާރާތްތަކާއި އެކޮމޮޑޭޝަން ބްލޮކުގެ އިތުރުން އެއާ ޓްރެފިކް ކޮންޓްރޯލު ޓަވަރުވެސް ވަނީ ނިންމާފައެވެ. އެއާޕޯޓް ތަރައްގީކުރި ކުންފުނީގެ ފަރާތުން ބުނަނީ މިހާރު އެއާޕޯޓު އޮތީ ފްލައިޓް ޖެއްސޭ ހާލަތުގައި ކަމަށެވެ.
