ރައީސްގެ މި ދަތުރުފުޅުގައި އެމަނިކުފާނު ދަތުރުފުޅު ކުރައްވަން ހަމަޖެހިފައިވަނީ ނ. މާފަރަށާއި، ލަންދޫއަށާއި، މަނަދޫއަށާއި، މަގުދޫ އަދި ހޮޅުދޫއަށެވެ.

 މި ދަތުރުފުޅުގެ ތެރެއިން ނ. އަތޮޅު ކައުންސިލާއި، ވަކި ވަކި ރަށްރަށުގެ ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި، ބައެއް ރަށްރަށުގެ ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފައެވެ. އަދި އެމަނިކުފާނު ދަތުރުކުރައްވާ ރަށްރަށުގެ ބައެއް މުއައްސަސާތަކަށް ޒިޔާރަތްކުރައްވައި އެތަންތަނުގެ ހާލަތު ބައްލަވާލެއްވުމަށް ހަމަޖެހިފައިވެއެވެ.

އޭގެ އިތުރުން ދެ ދުވަހުގެ މި ދަތުރުފުޅުގައި ރައީސް ވަނީ ލަންދޫ މިސްކިތާއި، ބަނދަރު ހުޅުއްވައި ދެއްވުމަށާއި، މަގޫދޫގައި އަލަށް އިމާރާތްކޮށްފައިވާ އިންޖީނުގެ ހުޅުއްވައި ދެއްވުމަށާއި، ހޮޅުދޫ ފުޓްބޯޅަދަނޑު ރަސްމީކޮށް ހުޅުއްވައި ދެއްވުމަށް ހަމަޖެހިފައެވެ.

އެމަނިކުފާނުގެ މި ދަތުރުފުޅުގައި، މިނިސްޓަރުންނާއި، ސަރުކާރުގެ ބައެއް އިސްވެރިން ބައިވެރިވެ ވަޑައިގަންނަވައެވެ.

ރައީސްގެ މިދިޔަ އަހަރުގެ އެންމެ ފަހު ވަޑައިގެންނެވީ ކ މާފުއްޓެވެ.

އެރަށަށް ވަޑައިގެންނެވީ  10.8 މިލިއަން ރުފިޔާއަށް ތަރައްގީ ކުރި ޕިކްނިކް އައިލެންޑާއި އެ ރަށުގެ ހިއްކި ބިން ކައުންސިލްއާ ހަވާލު ކުރެއްވުމަށްޓަކައެވެ. އެއީ މިދިޔަ ޑިސެމްބަރު މަހުގެ 28ގައެވެ.

ނ. އަތޮޅަށް ރައީސް މި ކުރައްވާ ދަތުރުފުޅަކީ މިއަހަރު އަތޮޅުތެރެއަށް ކުރައްވާ ފުރަތަމަ ދަތުރުފުޅެވެ.