ޔާމީން ރަޝީދުގެ ހަށިގަނޑުގެ 34 ތަނަކަށް ވަޅިން ހަމަލާދީ އޭނާ މަރާލި މައްސަލާގައި ކުށް ސާބިތުވާކަމަށް ހުކުމްކުރީ ދައުވާ އުފުލި ހަ މީހުންގެ ތެރެއިން ދެމީހުންގެ މައްޗަށެވެ
އެއީ ޔާމީން ދިރިއުޅެމުން ދިޔަ ގޭގެ ތެރެއަށް ޔާމީން މަރާލުމަށް ވަޅި ހިފައިގެން ވަދެ ތިބި ދެމީހުން ކަމަށް ދައުލަތުން ތުހުމަތުކުރި ހައިޝަމް އާއި ޒިހާންއެވެ.
މި ދެ މީހުންގެ މައްޗަށް ކުށް ސާބިތުކުރުމަށްފަހު އަދަބު ކަނޑައެޅުމަށް ބޭއްވި މަޖިލީހުގައި ޔާމީންގެ ބައްޕަ ފިޔަވައި ހުރިހާ ވާރިސުން ބައިވެރިވެފައިވެއެވެ.
ޔާމީންގެ ބައްޕަ ބޭނުންވީ ގާތިލުންގެ ކިބައިން މަރަށް މަރު ހިފުމަށެވެ. ނަމަވެސް ޔާމީންގެ މަންމަ ބޭނުންވީ މަރުގެ ދިޔަ ނެގުމަށެވެ.
އެހެންކަމުން ކޯޓުން ހުކުމް ކުރީ މަރުގެ ދެމީހުން އުމުރަށް ޖަލަށްލުމާއިއެކު، އެމީހުން 1.3 މިލިއަން ރުފިޔާއިން ޖޫރިމަނާކުރާށެވެ.
2017 އޭޕްރީލް މަހު 23 ވަނަ ދުވަހުގެ ރޭ ދަންވަރު 2:59 ހާއިރު ޔާމީން ރަޝީދު މަރާލީ އޭނާ ގޭގެ ސިޑި ގޮޅީގައެވެ. ބަޔަކު ވަރަށް ރާވައިގެން ޔާމީނަށް ވަރަށް އަނިޔާވެރިކޮށް ހަމަލާ ދިނީ، އޭނާ ވަޒީފާ ނިންމާލާ، އެނބުރިގެއަށް އައި ވަގުތުގައެވެ.
