ދިރިއުޅޭ ގޭގެ ލިފްޓް ކައިރީ ޔާމީން ރަޝީދަށް ގިނަ ހަމަލާތަކެއް ދިނުމަށް ފަހު މަރާލި މައްސަލާގައި ޖުމްލަ ހަ މީހެއްގެ މައްޗަށް ތޫނު އެއްޗެއް ބޭނުންކޮށްގެން ގަސްދުގައި މީހަކު މަރާލުމުގެ ދައުވާ ކުރި އެވެ.
ދައުވާ އުފުލާފައިވާ މީހުން:
- މ. ތާއިފް، އިސްމާއިލް ރަޝީދު
- ހ. އަންނާރުމާގޭ އިސްމާއިލް ހައިޝަމް ރަޝީދު
- މ. އިރަސްމިކުގޭ އަހުމަދު ޒިހާން އިސްމާއިލް
- ގދ. ގައްދޫ ސިންދުބާދުގޭ، މުހައްމަދު ދިފްރާން
- މ. ކުދެހިގޭ ހަސަން ޝިފާޒް
- މ. ކޮޅުފުށީ އީސްޓް، ހުސައިން ޒިޔާދު
އިއްޔެ ކްރިމިނަލް ކޯޓުގައި ހުކުމް ކުރުމަށް ބޭއްވި އަޑުއެހުމުގައި، ޔާމީން ރަޝީދުގެ ހަށިގަނޑުގެ 34 ތަނަކަށް ވަޅިން ހަމަލާދީ އޭނާ މަރާލިކަމުގެ ކުށް ސާބިތުވިކަމަށް ހުކުމް ކުރީ، މީގެ ތެރެއިން ހައިޝަމް އާއި ޒިހާންގެ މައްޗަށެވެ.
އެހެން ކަމުން ކްރިމިނަލް ކޯޓުން ވަނީ މި ދެމީހުން އުމުރު ދުވަހަށް ޖަލަށް ލުމަށާއި، އެއް އަހަރު ދުވަސް ތެރޭ 1.3 މިލިއަން ރުފިޔާ ސިވިލް ކޯޓަށް ދެއްކުމަށް ހުކުމް ކޮށްފައެވެ.
މީގެ އިތުރުން ކުށުގެ ކައްފާރާގެ ގޮތުން 60 ދުވަހު ރޯދަ ހިފުމަށް ވެސް މި މީހުންގެ މައްޗަށް ވަނީ ހުކުމް ކޮށްފައެވެ.
އެކަމާއި ގުޅިގެން ޕީޖީ އޮފީހުން ނެރުނު ބަޔާނުގައި ބުނީ ހައިޝަމް އާއި، ޒިހާން އަކީ ޔާމީން ރަޝީދު މަރާލުމުގެ އަމަލުގައި އަމަލީގޮތުން ބައިވެރިވެ، މިކަމުގައި އެންމެ އިސް ދައުރެއް އަދާކުރި ދެ މީހުން ކަމަށާއި، މި ދެމީހުންގެ މައްޗަށް ކުށް ސާބިތުވާކަމަށް ކަނޑައެޅުމަކީ މިމައްސަލައިގައި އިންސާފު ހޯދައިދިނުމަށް ކުރާ މަސައްކަތުގައި ލިބުނު ކާމިޔާބީއެއްގެ ގޮތުގައި އެއޮފީހުން ދެކޭ ކަމަށެވެ.
މި މައްސަލައިގައި އިތުރު 04 (ހަތަރެއް) މީހުންގެ މައްޗަށް ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ފަސް ވަނަ މާއްދާގެ ދަށުން، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ ކޮށްފައިވެއެވެ.
އެއީ:
- ގދ. ގައްދޫ، ސިންދުބާދުގެ، މުޙައްމަދު ދިފްރާންއާއި،
- މ. ކުދެހިގެ، ޙަސަން ޝިފާޒުއާއި،
- މ. ޠާއިފް، އިސްމާޢީލް ރަޝީދުއާއި،
- މ. ކޮޅުފުށި، އީސްޓް، ޙުސައިން ޒިޔާދެވެ.
ޕީޖީ އޮފީހުން ބުނީ އެ ހަތަރު މީހުންނަކީ ވެސް ޔާމީން ރަޝީދު މަރާލުމުގެ އަމަލު ރޭވުމުގަ އާއި، އެކަން ތަންފީޒުކުރުމުގައި އެކިމިންވަރަށް ބައިވެރިވެފައިވާ ބައެއްކަން މައްސަލައިގެ ހެކިޤަރީނާއިން އެނގޭ ކަމަށެވެ.
މި ހަތަރު މީހުންގެ މައްޗަށް ކުރި ދައުވާތައް ސާބިތުނުވާކަމަށް ކްރިމިނަލް ކޯޓުން ހުކުމް ކުރައްވާފައިވާތީ، އެ ހުކުމް ހައިކޯޓުގައި އިސްތިއުނާފު ކުރުމުގެ ނިޔަތް އެބައޮތް ކަމަށްވެސް އެބަޔާނުގައި ބުނެފައިވެއެވެ.
މީގެ ހަތަރު އަހަރު ކުރިން 2017 ވަނަ އަހަރު އޭޕްރީލް މަހު 23 ވަނަ ދުވަހުގެ ރޭ ދަންވަރު 2:59 ހާއިރު ޔާމީން ރަޝީދު މަރާލީ އޭނާ ގޭގެ ސިޑި ގޮޅީގައެވެ. ބަޔަކު ވަރަށް ރާވައިގެން ޔާމީނަށް ވަރަށް އަނިޔާވެރިކޮށް ހަމަލާ ދިނީ، އޭނާ ވަޒީފާ ނިންމާލާ، އެނބުރިގެއަށް އައި ވަގުތުގައެވެ.
