މި ނިންމުން ނިންމީ މާލޭ ސިޓީ ކައުންސިލުގެ 4 ވަނަ ދައުރުގެ 37 ވަނަ ޖަލްސާގައެވެ. އެ ޖަލްސާގައި ވަނީ މާލޭ ރައްޔިތުންނަށް ދިމާވެފައިވާ ގެދޮރުގެ މައްސަލަ ހައްލުކުރުމަށް ސަރުކާރަށް ދަންނަވައިގެން މިހާތަނަށް ކުރި މަސައްކަތުގެ ނަތީޖާގެ އަލީގައި ދެން ކުރިއަށްދާނެ ގޮތަކާމެދު މަޝްވަރާ ކޮށްފައެވެ.
މި ޖަލްސާގައި ހުޅުމާލެ ދާއިރާގެ ކައުންސިލަރު އިބްރާހީމް ޝުޖާއު ވަނީ މާލޭގައި ކުދި ބިންތައް ހުރި މީހުން އެ ބިންތައް ދޫކޮށްލުމާއެކު މާލެ ސިޓީން ދޫކުރާ ގޯއްޗަށް ކުރިމަތިލުމުގެ ފުރުސަތު ހުޅުވައިލުމާއި، އެކަމަށް ޝައުޤުވެރިކަން ހުރި މީހުން ދެނެގަތުމަށް މާލެ ސިޓީ ކައުންސިލުން އިސްނަގައިގެން އޮންލައިން ޕޯޓަލެއް ޤާއިމުކުރުމަށް ހުށަހަޅުއްވާފައެވެ. މިކަމަށް ތާއީދު ކުރައްވާފައިވަނީ ޑެޕިއުޓީ މޭޔަރު އަހްމަދު ނަރީޝް އެވެ.
މިކަމާ ގުޅޭގޮތުން ކުރެވުނު މަޝްވަރާގައި މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ ލާމަރުކަޒީ ޤާނޫނުގައިވާ ގޮތުން ޤައުމީ އިދާރާތަކުން މާލެ ސިޓީގެ އިހްތިސާސްގައިވާ ސަރަހައްދެއްގައި އެއްވެސް މަޝްރޫއެއް ހިންގަންވާނީ ސިޓީ ކައުންސިލާ މަޝްވަރާކުރުމަށް ފަހުގައި ކަމަށެވެ. ނަމަވެސް ޤާނޫނުގައިވާ ފަދައިން މާލެ ސިޓީ ކައުންސިލްގެ ހްތިސާސްގައި ހިމެނޭ ހުޅުމާލޭގައި އެޗްޑީސީން ކުރިއަށްގެންދާ އެއްވެސް ކަމެއްގައި ސިޓީ ކައުންސިލާ އެއްވެސް މަޝްވަރާއެއް ކޮށްފައި ނުވާ ކަމަށް ޑރ. މުއިއްޒު ވިދާޅުވިއެވެ.
ޑރ. މުއިއްޒު ވިދާޅުވީ ސިޓީ ކައުންސިލާ ކަންކަމުގައި މަޝްވަރާކުރާނަމަ، މާލޭ ރައްޔިތުންގެ ގޯތިގެދޮރުގެ މައްސަލާގައި ވެސް ރައްޔިތުން އެދޭ ގޮތްތައް ސަރުކާރަށް ވަރަށް ސާފުކޮށް އެނގޭނެ ކަމަށެވެ. މާލޭގައި ކުދި ގޯތިތައް ހުރި މީހުންވެސް އެފަދަ ގޯތިތައް ދޫކޮށްލުމަށްފަހު ހުޅުމާލެއިން ގޯތި ދޫކުރާނަމަ އެ ފުރުސަތު ބޭނުންވާ ކަމަށް އެދި މޭޔަރަށް ސިޓީ ހުށަހަޅާފައިވާކަން އެމަނިކުފާނު ފާހަގަކުރެއްވިއެވެ. އެހެންކަމުން ސަރުކާރުން އެފަދަ ފުރުސަތެއް ހުޅުވާލާއިރު މާލޭގެ ރައްޔިތުންގެ ގެދޮރުވެރިކަމާ ގުޅޭ މިފަދަ ދަފުތަރެއް އެކުލަވައިލެވިފައި އޮތުމުން ކަންކަން ތަންފީޒުކުރަން ސަރުކާރަށް ވެސް ފަސޭހަވާނެ ކަމަށެވެ.
މިކަމާ ގުޅޭ މަޝްވަރާގައި ވާހަކަފުޅު ދައްކަވަމުން ކައުންސިލަރު އިބްރާހީމް ޝުޖާއު ވިދާޅުވީ މާލޭގައި ކުދި ބިންކޮޅު ހުރި މީހުން އެ ބިންތައް ދޫކޮށްލުމަށްފަހު ހުޅުމާލެއިން ނުވަތަ މާލޭގެ އެހެން ސަރަހައްދަކުން ވެސް ދޫކުރާ ގޯއްޗަށް އެދުމުގެ ފުރުސަތު ބޭނުންވާ މީހުން ދެނެގަތުމަކީ މާލެ ސިޓީ ކައުންސިލްގެ ޒިންމާއެއް ކަމަށެވެ. އަދި އެފަދަ މީހުން ދެނެގަތުމަށްފަހު އެ ދަފުތަރު ސަރުކާރަށް ހުށަހެޅުމަކީ ސަރުކާރަށްވެސް އަދި ސިޓީ ކައުންސިލަށް ވެސް ފަސޭހަވެގެން ދާނެ ކަމެއް ކަމަށެވެ.
މާލޭ ސިޓީން ގޯތި ބޭނުންވާ މީހުންގެ ދަފުތަރު އެކުލަވައިލުމަށް ހުށަހެޅުނު ހުށަހެޅުން ފާސްވީ ޖަލްސާގައި ބައިވެރިވި 16 ކައުންސިލަރުންގެ އިއްތިފާޤުންނެވެ. އެހެންކަމުން މި ނިންމުން ތަންފީޒު ކުރުމަށް ކުރަންޖެހޭ ކަންކަން ޤާނޫނާއި ޤަވާއިދާ އެއްގޮތްވާ ގޮތުގެ މަތިން މާލެ ސިޓީ ކައުންސިލުން ކުރިއަށް ގެންދިއުމަށް ނިންމާފައިވާ ކަމަށް އެކައުންސިލުން ބުނެއެވެ.
