ހިޔާ ޔޫނިއަންގެ ރައީސް އަބްދުﷲ އަމްޒަލް "ސީއެންއެމް"އަށް ވިދާޅުވީ ފްލެޓްތަކުގެ އަހުލުވެރިން މަސައްކަތް ކުރަމުންދާއިރު އަދިވެސް ގިނަ ހުރަސްތަކެއް އެބަހުރި ކަމަށެވެ. އެގޮތުން ކޮވިޑްގެ ހާލަތާއި މުދާ ނުލިބުމުގެ މައްސަލަ އޭނާ ފާހަގަ ކުރެއްވިއެވެ.
މީގެ ކުރިން ސަރުކާރުން ވަނީ، ގްރޭސް ޕީރިއަޑްގެ މުއްދަތް ހަމަވެ ޖަނަވަރީ މަހުގެ 01 ވަނަ ދުވަހުން ފެށިގެން ކުލި ނެގުމަށް ނިންމާފައެވެ. އެހެންނަމަވެސް ހިޔާފްލެޓްތަކުގެ ވެރިން ކުރި މުޒާހަރާއާއި ގުޅިގެން ފިނިޝިންގެ މަސައްކަތްތައް ނިންމުމަށް ގްރޭސް ޕީރިއަޑްގެ މުއްދަތު ވަނީ އިތުރު ކޮށްފައެވެ. އިތުރު ކުރީ އަންނަ މާޗް މަހުގެ ނިޔަލަށެވެ.
އެހެންނަމަވެސް ހިޔާ ޔޫނިއަނުން ބުނީ ބައެއް އެޕާޓްމެންޓްތައް ހަދަމުންދާއިރު މަސައްކަތް ކުރާ ފަރާތްތަކުގެ މުވައްޒަފުން ކޮވިޑް ޖެހި، މަސައްކަތްތައް މެދުކެނޑެމުންދާ ކަމަށެވެ. އަދި މިދުވަސްވަރު ޗައިނާ ބަންދުވެފައިވުމާއެކު ވިޔަފާރިވެރިންނަށް މުދާ ގެނައުމުގައި ދަތި ތަކެއް ހުރުމުންވެސް ލަސްތައް ވަމުން އަންނަކަމަށް އެ ޔޫނިއަނުން ބުނެއެވެ.
އަމްޒަލް ވިދާޅުވީ މުއްދަތަށް ޔުނިޓްތައް ނުނިމުނު ނަމަވެސް ވަކި ހަރަކާތްތަކެއް ހިންގަން އަދި ނިންމާފައި ނުވާ ކަމަށެވެ. އެހެންނަމަވެސް ކަމާބެހޭ ފަރާތްތަކާ އަބަދުވެސް ވާހަކަ ދައްކަމުން ގެންދާ ކަމަށެވެ.
ޔޫނިއަނުން ބުނީ މިދުވަސްކޮޅުވެސް ބައްދަލުވުމެއް ބޭވުމަށް ހައުސިން މިނިސްޓްރީގައި އެދިފައިވާނެ ކަމަށާއި، އެހެންނަމަވެސް ކޮމަންޑޫ ދާއިރާގެ އިލެކްޝަން ވެސް އޮތުމާއެކު ބައްދަލުވުމަށް އަދި ވަގުތު ލިބިފައިނުވާ ކަމަށެވެ.
ހިޔާ ފްލެޓްތަކުގެ ކުއްޔަކީ 8500ރުފިޔާއެވެ.
