ރައީސް ސޯލިހު މިއަދު އިއްވެވި ރިޔާސީ ބަޔާނުގައި އެމަނިކުފާނު ވިދާޅުވީ، މަސްތުވާތަކެތީގެ ވިޔަފާރިއަކީ ބޮޑު ފަހަތެއް އޮންނަ، އިންތިޒާމްވެ ގުޅިގެން ހިންގާ ބައިނަލްއަގުވާމީ ބޮޑު ވިޔަފާރިއެއް ކަމަށާއި އެ ދޮރުތައް ބަންދުކޮށް އެ ވިޔަފާރި ހުއްޓުވުމަކީ އިންތިހާއަށް ގޮންޖެހުން ބޮޑު ކަމެއް ކަމަށެވެ.
އެހެން ނަމަވެސް ރާއްޖެއަށް ދިމާވެފައިވާ މި ވަބާއިން ގައުމު ސަލާމަތް ކުރުމަށް ދިވެހި ސަރުކާރުގެ ހުރިހާ ވަސީލަތެއް ބޭނުން ކޮށްގެން މަސައްކަތް ކުރައްވާނެ ކަމަށާއި، މިކަމުގައި ޝާމިލްވާ ފަރާތްތަށް ހޯދާ ގާނޫނު އަސާސީއާއި އެއްގޮތް ވާގޮތުގެ މަތިން ފިޔަވަޅު އަޅާނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން އެމަނިކުފާނު ވިދާޅުވީ، އަދުގެ ސަރުކާރުން މިހާރުވެސް މަސްތުވާ ތަކެއްޗާއި ދެކޮޅަށް ހާއްސަ އޮޕަރޭޝަން ތަކެއް ކުރިއަށް ގެންދަވާ ކަމަށާއި، އެގޮތުން މިދިޔަ ތިން އަހަރަކީ ރާއްޖޭގެ ތާރީހުގައި މަސްތުވާތަކެއްޗާއި ދެކޮޅަށް ކަންކަން އެންމެ ހަރުދަނާކޮށް ކުރެވުނު ތިން އަހަރު ކަން އެމަނިކުފާނު ފާހަގަ ކުރެއްވިއެވެ.
މީގެ އިތުރުން ރައީސް ވިދާޅުވީ، މަސްތުވާތަކެއްޗާއި ގުޅުންހުރި ކުށްކުރާ ފަރާތްތަކުގެ ފަރުވާއަށް ސަރުކާރުން ހާއްސަ އިސްކަމެއް ދީގެން މަސައްކަތް ކުރަމުން އަންނަ ކަމަށާއި، އެގޮތުން އަމިއްލަ ރަށުގައި ހުރި ފަރުވާ ލިބޭނެ ނިޒާމް އަންނަ އޭޕްރީލް މަހުގެ ތެރޭގައި ފެށިގެން ދާނެ ކަމަށެވެ. އަދި މި މަސައްކަތް ކުރިއަށް ދާނީ ރަށު ކައުންސިލާއި ސިއްހީ މަރުކަޒުގެ ބެލުމުގެ ދަށުން ކަމަށްވެސް އެމަނިކުފާނު ވިދާޅުވިއެވެ.
މީގެ އިތުރުން، އައްޑޫ ސިޓީ ހުޅުމީދޫގައި ޑްރަގް ރިހެބިލިޓޭޝަން ސެންޓަރުގެ މަސައްކަތް މިހާރު ނިންމާފައިވާކަން ރައީސް ފާހަގަކުރެއްވިއެވެ.
