އެޑިއުކޭޝަން މިނިސްޓަރު މިފަދައިން ވިދާޅުވީ، ޓީޗަރުންގެ މުސާރަ ބޮޑުކުރުމަށް ރައީސް އިބްރާހިމް މުހައްމަދު ސޯލިހް ނިންމެވުމާއި ގުޅިގެން ކުރެއްވި ޓްވީޓެއްގައެވެ.
މިއަދު އިއްވެވި ރިޔާސީ ބަޔާނުގައި ރައީސް ސޯލިހު ވިދާޅުވީ، އަންނަ މޭ މަހުން ފެށިގެން ހުރިހާ ޓީޗަރުންގެ މުސާރަ ބޮޑުކުރަން ނިންމާފައި ވާކަމަށެވެ. އރގޮތުން ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ، އިތުރުގަޑި ނުލާ 12,628 ރުފިޔާ އިން 19,740 ރުފިޔާއަށް ބޮޑުވެގެންދާނެ ކަމަށާއި، މިއީ 56 ޕަސެންޓްގެ ކުރިއެރުމެއް ކަމަށެވެ.
މިކަމާއި ގުޅިގެން އެޑިއުކޭޝަން މިނިސްޓަރު ވިދާޅުވީ، މީގެ ކުރީން ދުވަހަކު ވެސް ބޮޑު ކޮށްދީފައި ނުވާ މިންވަރަކަށް މުދައްރިސުންގެ މުސާރަ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބޮޑުކޮށްދެއްވަން އިއުލާނުކުރެއްވިކަމީ، ސްކޫލްތަކާއި ގުޅިފައިވާ ހުރިހާ ފަރާތްތަކަކަށް ލިބުނު މަތިވެރި އުފަލެއް ކަމަށެވެ.
އެ ހުރިހާ ފަރާތްތަކެއްގެ ނަމުގައި ރައީސްއަށް ޝުކުރު ދަންނަވާ ކަމަށާއި، މުދައްރިސުންގެ މުސާރައިގެ މިންވަރު ގުޅިފައިވަނީ ދިވެހިރާއްޖޭގެ ތަރައްގީ އާއި ކަމަށްވެސް ވިދާޅުވި އެވެ.
އެހެންކަމުން ހުނަރުވެރި ދަރިވަރުން މުދައްރިސްކަމާ ކުރިމަތިލުމަށް އިލްތިމާސް ކުރައްވާ ކަމަށާއި، މޮޅެތި މުދައްރިސުން ވަޒީފާގައި ދެމިތިބޭނެ ކަމަށް އުއްމީދު ކުރައްވާ ކަމަށް މިނިސްޓަރު ވިދާޅުވި އެވެ.
