އެމެރިކާގެ އައިޑަހޯއަށް ނިސްބަތްވާ ޑޭވިޑް ރަޝް ވަނީ މިދިޔަ އަހަރުގެ ކޮންމެ ހަފްތާއަކު ރިކޯޑެއް ހަދާފަ އެވެ. އޭނާ ބުނީ އޭނާ އެކަން ކުރީ ކިޔަވާ ކުދިންނަށް ހިތްވަރު ދިނުމުގެ ގޮތުން ކަމަށެވެ.
ރަޝްއަކީ ސައިންސް، ޓެކްނޮލޮޖީ، އިންޖިނިއަރިން އަދި މެތަމެޓިކްސް (ސްޓެމް) އެކި ގޮތްގޮތުން ޕްރޮމޯޓު ކުރުމަށް ދަރިވަރުންނާއި ޓީޗަރުންގެ އިތުރަށް ކޯޕަރޭޝަންތަކަށް ސެމިނާތައް ބާއްވަން އަންނަ މީހެކެވެ. އޭނާ ބުނީ މިދިޔަ އަހަރު ހެދި ވޯލްޑް ރިކޯޑްތަކުގެ މައިގަނޑު އަމާޒަކީ ކޮންމެ ކަމަކީ ވެސް މަސައްކަތުން ހާސިލްކުރެވޭނެ ކަމެއް ކަން ދަރިވަރުންނަށް ދެއްކުން ކަމަށެވެ.
"ސްޓެމް ކިޔެވުމަކީ ވަރަށް ދަތި ކަމެއް. ދަރިވަރެއް މެތް ނުވަތަ ސައިންސުން ދަށްވެއްޖިއްޔާ ހިތައް އަރާފާނެ ތިމަންނަޔަކަށް އިންޖީނިޔަރަކަށް ނުވެވޭނޭ. އަހަރެން އެންމެ ފުރަތަމަ ރިކޯޑެއް ހެދީ 2015 ވަނަ އަހަރު. އެއީ ތިމާގެ ސިނކުޑީގެ ބޭނުންކޮށްގެން ހިތްވަރާއެކު ކިތައްމެ ދަތި ކަމެއް ވިޔަސް ހާސިލްކުރެވޭނެކަން ދައްކަން."
ރަޝް މިދިޔަ އަހަރު ޖެނުއަރީގައި ވޯލްޑް ރިކޯޑް ހަދަން ފެށި އިރު އެންމެ ފުރަތަމަ ހެދި ރިކޯޑަކީ އެއް މިންޓްތެރޭ އެންމެ ގިނަ ސައިބޯނި އެތުރުމުގެ ރިކޯޑެވެ. އެއަށް ފަހު އެންމެ އަވަހަށް ޕިންޕޮން ބޯލެއް ފަސް ތައްޓަށް ވެއްޓުމުގެ ރިކޯޑާއި، އެއް މިނެޓް ތެރޭ އެންމެ ގިނަ މާޝްމެލޯ އަގަނއިން ހިފުމުގެ ރިކޯޑާއި، ޖަގްލިން ރިކޯޑުތަކުގެ އިތުރުން ވެސް އެތައް ރިކޯޑެއް ހެދި އެވެ.
