ބޫސްޓާ ދެޑޯޒް އޮޅިގެން މިއަދު އަނެއްކާވެސް ޖެހިފައިވަނީ ގެމަނަފުށީ ސިއްހީ މަރުކަޒުންނެވެ. އެ ރަށު މަރުކަޒުން ބޫސްޓާ ދެޑޯޒް ޖަހާފައިވަނީ އުމުރުން 70 އަހަރުގެ އަންހެނެއްގެ ގަޔަށެވެ.
އެ އަތޮޅު ހޮސްޕިޓަލް މެނޭޖާ ޝަރީފް އަހުމަދު "ސީއެންއެން' އަށް ވިދާޅުވީ، ހަތަރުވަނަ ޑޯޒެއް ސިއްހީ މަރުކަޒުން ޖެހިފައިވަނީ އޮޅިގެން ކަމަށް އެ މަރުކަޒުން މައުލޫމާތު ދޭ ކަމަށެވެ. އެ ފަދަ މައްސަލައެއް ގެމަނަފުށީ ސިއްހީ މަރުކަޒުގައި ހިގާފައިވާ ކަމަުގެ މައުލޫމާތު ލިބިމާއި ގުޅިގެން މިވަގުތު ވިލިގިލީ ހޮސްޕިޓަލުގެ ޓީމެއް ގެމަނަފިށީ ސިއްހީ މަރުކަޒުގައި ހަރަކާތް ތެރިވަމުންދާ ކަމަށް އޭނާ ވިދާޅުވިއެވެ.
ގެމަނަފުށީ ސިއްހީ މަރުކަޒުން 70 އަހަރުގެ އަންހެނެއްގެ ގަޔަށް ހަތަރުވަނަ ޑޯޒް ޖަހާފައިވާއިރު އިއްޔެގެ ވަގުތެއްގައި އުމުރުން ދުވަސްވީ އަންހެނެއްގެ ގަޔަށް ހަމަ އެ އަތޮޅު ދާންދޫގައި ވެސް ވެކްސިންގެ ހަތަރު ވަނަ ޑޯޒް އެއް ޖެހި މައްސަލައެއް ވަނީ ފެންމަތިވެފައެވެ. މިމައްސަލަވެސް މިއަދުވަނީ ބަލަން ފަށާފައެވެ.
މައުލޫމާތު ލިބިފައިވާ ގޮތުގައި ވެކްސިންގެ ހަތަރުވަނަ ޑޯޒް އިއްޔެ ޖަހާފައިވަނީ ގއ. ދާންދޫ އުމުރުން 82 އަހަރުގެ އަންހެނެއްގެ ގަޔަށެވެ.
ނަން ނުޖެހުމަށް ޝަރުތުކޮށް "ސީއެންއެމް" އަށް މައުލޫމާތު ދެމުން އެރަށު ހެލްތު ސެންޓަރުން މައުލޫމާތު ދިން އޮފިޝަލަކު ވިދާޅުވީ، ވެކްސިންގެ ހަތަރު ވަނަ ޑޯޒް އެއް އެމީހާ ގަޔަށް ޖެހުނީ އެރި އޮޅުމެއްގެ ސަބަބުން ކަމަށާއި، ވެކްސިން ޖެހުމުން އަންހެން މީހާ ހެލްތު ސެންޓަރުގައި އެޑްމިޓް ކޮށްގެން ފަރުވާ ދެމުން އަންނަ ކަމަށެވެ.
އަދި އަންހެން މީހާގެ ކަންކަން ގާތުން ބަލަމުން އަންނަ ކަމަށާއި، އަންހެން މީހާގެ ހާލަތު ރަނގަޅު ކަމަށް ވެސް އޮފިޝަލް ވަނީ ވިދާޅުވެފައެވެ. މި ހާދިސާއާއި ގުޅިގެން ހެލްތް މިނިސްޓްރީގެ ކޮލިޓީ އެޝުއަރެންސް ކޮމިޝަނަރު ތަސްލީމާ އުސްމާން ވިދާޅުވީ، ވެކްސިންގެ ހަތަރު ވަނަ ޑޯޒްއެއް އުމުރުން ދުވަސްވީ މީހެއްގެ ގަޔަށް ޖެހި ކަމުގެ މައުލޫމާތު އެ މިނިސްޓްރީއަށް ލިބިފައިވާ ކަމަށާއި، އެކަމާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ.
މިކަމާއި ގުޅޭ އިތުރު ތަފްސީލެއް ތަސްލީމާ ދެއްވާފައި ނުވެއެވެ.
ދާންދޫގައި އުމުރުން ދުވަސްވީ މީހެއްގެ ގަޔަށް ވެކްސިން ޖެހުމުން އެކަން ފުރަތަމަ ސިއްރު ކުރަން ދާންދޫގައި ހުންނަ އެޗްޕީއޭގެ ފޯކަލް ޕޮއިންޓުން މަސައްކަތް ކުރި ކަމަށްވެސް ވަނީ މައުލޫމާތު ލިބިފައެވެ.
ގެމަނަފުށީ ފޯކަލް ޕޮއިންޓް އިންވެސް މިކަން ސިއްރުކުރަން ވެސް މަސައްކަތް ކުރިކަމަށާއި، އެފަދަ ކަމެއް ހިނގައިގެން އުޅޭ ކަމެއް އެ ފަރާތަށް އެގިފައި ނުވާ ކަމަށް ފޯކަލް ޕޮއިންޓްން ބުނި ކަމަށް ގެމަނަފުށީ ކައުންސިލް ރައީސް ރައީސް ނާޝިދު ވިދާޅުވިއެވެ.
