މިއަދު ޅ ނައިފަރުގައި ވާހަކަ ދައްކަވަމުން ރައީސް ސޯލިހު ވިދާޅުވީ އިއްޔެ އެ އެއާޕޯޓު ހުޅުވުނު ކަމުގައި ވިޔަސް ރައްޔިތުންގެ ކަންބޮޑުވުން އެބައޮތް ކަމަށާއި އެއީ ޓިކެޓުގެ އަގުބޮޑުކަން ކަމަށްވެސް ވިދާޅުވިއެވެ.
"މިހިސާބަށް އަންނަން ކޮޅަކަށް 1020 ރުފިޔާ ހަރަދު ކުރަން ޖެހުނީމާ، އެ ބަލައިގަންނަން މިއަތޮޅުގެ ރައްޔިތުންނަށް ކުޑަކޮށް ދަތި" ރައީސް ސޯލިހު ވިދާޅުވިއެވެ.
ރައީސް ވިދާޅުވީ މިއަދު ވަކިގޮތެއް ކަނޑަ ނޭޅުނު ކަމުގައިވިޔަސް އައިލެންޑް އޭވިއޭޝަނާއެކު މަޝްވަރާ ކުރެއްވުމަށް ފަހު ލަސްތަކެއް ނުވެ އެކަމަށޤ ހެޔޮ ބަދަލެއް ގެންނެވުމުގެ މަސައްކަތް ކުރައްވާނެ ކަމަށެވެ.
މިއަދު ނައިފަރުގައި ސަރުކާރުން އިމާރާތްކުރި، 100 ހައުސިން ޔުނިޓް ކައުންސިލާ ހަވާލުކުރުމުގެ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ އިއްޔެ ހުޅުވިގެންދިޔަ އެއާޕޯޓުގެ ސަބަބުން އެއަތޮޅުގެ އިގްތިސާދަށް ހެޔޮ ބަދަލެއް އަންނާނެކަމަށާއި ރައްޔިތުންނަށް އިތުރު ފަސޭހަތަކެއް ލިބިގެން ދާނެ ކަމަށެވެ.
