ޖާބިރު މިފަދައިން ވިދާޅުވީ، ޖުޑިޝަލް ސާވިސް ކޮމިޝަން (ޖޭއެސްސީ) އެކުލަވާލާއިރު ސިޔާސީ މީހުން ނުހިމެނޭ ގޮތަށް ގާނޫނު އަސާސީއަށް އިސްލާހު ގެނައުމަށް ރައްޔިތުންގެ މަޖިލީހަށް މަހިބަދޫ ދާއިރާގެ ޕީޕީއެމް މެންބަރު އަހުމަދު ތޯރިގު ހުށައެޅުއްވި ބިލަށް ވާހަކަފުޅު ދައްކަވަމުންނެވެ.
ޖާބިރުގެ ވާހަކަގައި ބިލާއި ބެހޭ ގޮތުން ވާހަކަ ދެއްކުމުގެ ބަދަލުގައި ވިދާޅުވީ، މަޖިލީހުގެ ރައީސްގެ މަގާމުގައި ހުންނެވި ރައީސް މުހައްމަދު ނަޝީދުގެ ބަދަލުގައި އެމަގާމަށް މިހާރުން މިހާރަށް، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އައްޔަން ކުރަންޖެހޭ ކަމަށެވެ.
މީގެ އިތުރުން މަޖިލީހުގައި ވާހަކަ ދައްކަވަމުން ޖާބިރު ވިދާޅުވީ، ރާއްޖެ ހަމަ މަގަށް އެޅުވުމަށް އޮތީ ގާނޫނު އަސާސީން ކަމަށާއި، ރާއްޖޭގެ ދިފާއީ ބާރުތަކަށް ގާނޫނޫ އަސާސީއިން ލާޒިމް ކޮށްފައިވަނީ، ދިވެހި ރާއްޖެ ދިފާއު ކުރުން ކަމަށާއި، އެހެން ނަމަވެސް އެކަން ނުވާ ކަމަށެވެ.
ޖާބިރު ދެއްކެވި ވާހަކަތަކަށް މަޖިލީހުގައި ތިއްބެވި މެމްބަރުން ވަނީ ތާއީދުކޮށް އަތްތިލަ ބަޑި ޖަހާފައެވެ. އެހެން ނަމަވެސް މަޖިލީހުގެ ރިޔާސަތުގައި އިންނެވި ހަސަން އަފީފު ވަނީ ހުށައެޅިފައިވާ ބިލަށް ވާހަކަ ދެއްކުމަށް މެމްބަރު ޖާބިރުއަށް އިލްތިމާސް ކުރައްވާފައެވެ.
އެހެން ނަމަވެސް ޖާބިރު ވަނީ ވަގުތު ހަމަވުމަށް ފަހުވެސް މާރިޔާ ހައްޔަރު ކުރުމަށް ގޮވާލާ ދެއްކި ވާހަކަ ކުރިއަށް ގެންގޮސްފައެވެ.
