އެމްއެމްޕީއާރުސީ ހިޔާނާތާއި ގުޅިގެން މިހާރުގެ ސަރުކާރުގެ ބައެއް ފަރާތްތަކާއި ކުރީ ސަރުކާރުގެ ބައެއް ފަރާތްތަކުގެ އިތުރުން މަޖިލީހުގެ ބައެއް މެމްބަރުން ހިމެނޭ ހިޔާނާތުގެ ލިސްޓެއް ވަނީ މީގެ ކުރިން އާއްމުކޮށްފައެވެ. އަދި އެ ފަރާތްތަކާއި މެދު ތަހުގީގު ހިންގާ ދައުވާ ކުރާނެ ކަމަށް ސަރުކާރުން ވަނީ ބުނެފައެވެ.
ރައީސް ނަޝީދު މިއަދު ކުރެއްވި ޓުވީޓެއްގައި ވިދާޅުވީ، އެމްއެމްޕީއާރުސީ ހިޔާނާތުގެ މައްސަލަ ތަހުގީގު ކުރުމަށް ބޭރުގެ ފޮރެންސިކް އޮޑިޓަރުން ހޯދުމަށް މީގެ ކުރިން އެތައް ފަހަރެެއްގައި އެދިފައި ވާނެ ކަމަށެވެ.
ރައީސް ނަޝީދު މިއަދު މިފަދައިން ވިދާޅުވެފައި ވާއިރު، މި އަހަރުގެ ރިޔާސީ ބަޔާން އިއްވަވަމުން ރައީސް އިބްރާހިމް މުހައްމަދު ސޯލިހު ވަނީ ހިޔާނާތުގެ މައްސަލަ ބެލުމަށް އުފެއްދި ރިޔާސީ ކޮމިޝަން ކަމަށްވާ އެސެޓް ރިކަވަރީ ކޮމިޝަން އުވާލާނެ ކަމުގެ އިޝާރާތެއް ދެއްވާފައެވެ.
އެމްއެމްޕީއާރުސީ ހިޔާނާތުގެ މައްސަލަ އާއި ގުޅިގެން މިހާތަނަށް ދައުވާކޮށް ހުކުމެއް ކޮށްފައިވަނީ، ރާއްޖޭގެ ކުރީގެ ރައީސް، ރައީސް އަބްދުﷲ ޔާމީންގެ މައްޗަށް އެކަންޏެވެ. އެހެން ނަމަވެސް އެ ހުކުމްވެސް ސުޕްރީމް ކޯޓުން ވަނީ ބާތިލް ކޮށް ރައީސް ޔާމީން މިނިވަން ކުރައްވާފައެވެ.
