ތަކަންދޫ ކައުންސިލް ރައީސް ހުސައިން ނައީމް ވިދާޅުވީ އެރަށު ބަނދަރުމަތީގައި ހުންނަ މަރިޔަންމާގޭގެ ވެރިފަރާތް ހޯދަން އިއުލާނު ކުރީ އެގޭގެ ވެރިފަރާތަކީ ކޮބައިކަން ނޭނގޭތީ ކަމަށާއި އަންގަން ޖެހޭ އެކިކަހަލައެންގުން އަންގަން ވެސް ދަތިތަކާއި ކުރިމަތިލާން ޖެހޭތީ ކަމަށެވެ.
"ވަރަށް ޒަމާންވީ ގެއެއް އެއީ . އިމާރާތެއް މިހާރަކު އެގޯތީގައިނެތް. ރަށުގެ ބަނދަރު މައްޗާވީ ދިމާލުގައި އޮންނަ ގޯއްޗެއް އެއީ. ގޯތި ސާފުކުރަން ޖެހުނަސް އަންގަން ޖެހޭ ފަރާތެއް ނޭނގޭ" ރައީސް ވިދާޅުވިއެވެ.
ކައުންސިލުން ބުނީ އިއުލާނާ ގުޅިގެން އެގޯތީގެ ވެރިފަރާތް ކަމަށްބުނެ ލިޔެކިއުންތަކާއެކު ކައުންސިލަށް މީހަކު ގޮސްފައިވާކަމަށެވެ. އެހެންނަމަވެސް ކޯޓަށް އެތަކެތި ހުށަހަޅައިގެން ކޯޓުން އަންގާ ގޮތެއްގެ މަތީން އަމަލު ކުރެވޭނެ ކަމަށެވެ.
އެކައުންސިލުން ބުނީ އެސަރަހައްދުގެ ބައެއް ގޭގޭގެ ފުރިހަމަ މައުލޫމާތު ކައުންސިލްގައި ނެތް ކަމަށެވެ. އަދި އެސަރަހައްދަކީ އެރަށުގައި އެންމެ ފުރަތަމަ މީހުން އުޅެން ފެށި ސަރަހައްދު ކަމަށްވެސް އެ ކައުންސިލުން ބުނެއެވެ.
ގޭގޭގެ ރަޖިސްޓްރީ ގެއްލިގެން އާންމުކޮށް އިއުލާނު ކުރި ނަމަވެސް ގެއެއްގެ ވެރިފަރާތް ގެއްލިގެން ހޯދަނީ ވަރަށް މަދުންނެވެ.
