އަދަބީ ލިއުންތަކުގެތެރޭގައި ތަފާތު ވައްތަރުގެ ލިއުންތައް ހުރެ އެވެ. އޭގެތެރެއިން ޅެމަކީ ވަކި ވަޒަނަކަށް ފެތޭގޮތަށް ހަދައި ކިއުންތެރީންނަށް ދޫކޮށްލެވޭ އެއްޗެކެވެ. އެއީ ވަކި ހަމަތަކެއް ހުންނަ އެޗެކެވެ. އެ ހަމަ ހިފަހައްޓައިގެން ގިނަ ޅެންތަކެއް ހެދުމަކީ މަދު މީހަކަށް ނޫނީ ނުކުރެވޭ ކަމެކެވެ. ނ މަނަދޫ ފެހިވިލާގޭ، އުމުރުން 37 އަހަރުގެ ހާރޫން ރަޝީދު (ހާރޭ)އަކީ މި ފަންނަށް މޮޅު މީހެކެވެ. 12 ވަރަކަށް ބައިތުގެ ޅެމެއް ހަދާލުމަކީ އޭނާ އަށް އެހާ ގިނަ ވަގުތު ތަކެއް ހޭދަވާ ކަމެއް ނޫނެވެ.
"ތިރީހަކަށް ސާޅީހަކަށް މިނިޓް ތެރޭ ނިންމާލެވޭނެ. އެހާވަރުގެ ޅެމެއް ހަދަން މާކަ ގިނަ ވަގުތު ތަކެއް ނުނަގާނެ" ގިނަ އަދަދެއްގެ ޅެން މިހާރު ވެސް ހަދާފައިވާ ހާރޭ ބުންޏެވެ.
ހާރޭގެ ޅެމެއް
ހާރޭގެ ޅެންތައް ބަހައްޓަނީ ތިލަކޮށެވެ. ރީތިކަން އޭނާގެ ޅެންތަކަށް އަންނަނީ ސާދާކޮށް ބުނަން ބޭނުންވާ އެއްޗެއް ބުނެވޭތީ ކަމަށް އޭނާ ގަބޫލު ކުރެ އެވެ. ހާރޭ ބުނީ އެންމެ ކުޑައިރުވެސް ޅެމާއި ރައިވަރު ކިޔަން ވަރަށް ޝައުގުވެރިކަން ހުންނަ ކަމަށެވެ. އަދި ޅެން ހަދަންފެށީ ވެސް ވަރަށް ކުޑައިރު ކަމަށާއި، އެއީ ގިނަ ދުވަސްތަކެއް ޅެން ކިއުމުގައި ހޭދަކުރުމަށް ފަހު، އެކަމުގެ ޝައުގުވެރިކަން ހުރެގެން ކަމަށް އޭނާ ބުނެ އެވެ.
"ވަރަށް ކުޑައިރު އެއީ ގާތްގަނޑަކަށް ގްރޭޑް 4 ނުވަތަ 5 ގައި އުޅުނުއިރުން ފެށިގެން ޅެން ހަދަން ފަށައިފިން" ހާރޭ ބުންޏެވެ.
މިހާރު ރިސޯޓެއްގައި ވަޒީފާ އަދާކުރަމުން އަންނަ ހާރޭ ބުނީ އޭނާ ކޮންމެ ތަނެއްގައި ހުއްޓަސް ޅެން ހަދާނެ ކަމަށާއި އެކަމަކު ޅެންފޮތެއް ނެރުމުގެ ޝައުގުވެރިކަމެއް އެއްގޮތަކަށް ވެސް ނެތްކަމަށެވެ. އޭނާ ގަބޫލު ކުރާ ގޮތުގައި ފޮތް ހަދައިގެން އެޗާޕު ކޮށްގެން އުޅުމަކީ މިހާރު ބޭނުންތެރި ކަމެއް ނޫނެވެ. އޮންލައިންކޮށް ދޫކޮށްލުމުން ބަލަން ބޭނުންވާ މީހުން އެ ބަލާނެ ކަމަށް އޭނާ ބުނެ އެވެ.
"ޒަމާން މިއޮތީ މިހާރު ބަދަލުވެފައި. ހަމަ ފޭސްބުކަށް ލާނީ. ފޮތެއް ހެދުމުގެ ވިސްނުމެއް ނެތް އެއްވެސް ވަރަކަށް. ފޮތެއް ނެރުނީމަ އޭތިއޮންނާނީ ހިރަފުސް އަރައަރާ" ކޮންމެ ދުވަހަކު ކަހަލަ ގޮތަކަށް ޅެން ހަދައި، ފޭސްބުކްގައި ޝެއާކުރާ ހާރޭ ބުންޏެވެ.
ހާރޭ ހަމައެކަނި ޅެން ހަދަނީކީއެއް ނޫނެވެ. ޅެން ދަސްކޮށްދިނުމުގެ މަސައްކަތް ވެސް އޭނާ މިހާރު ކުރެ އެވެ. އެގޮތުން އޭނާ ވަނީ ވޭތުވެދިޔަ ތިން އަހަރު އެކި ރަށްރަށުގައި ޕްރޮގްރާމްތައް ހިންގާފަ އެވެ. އ އަތޮޅު އޮމަދޫގައި އޭނާ އެރަށުގެ ސްކޫލްކުދީންނަށް ޕްރޮގްރާމެއް ހިންގި އެވެ. އަދި ފ. ދަރަނބޫދޫގައި މިއަހަރު ވަނީ ޕްރޮގްރާމެއް ހިންގާފަ އެވެ. އެއީ އެރަށުގެ އާންމުންނާއި ސްކޫލް ދަރިވަރުންނަށެވެ. އޭގެ އިތުރުން ކުޅުދުއްފުށީ ސިޓީގައި މިދިޔަ އަހަރު އޭނާ ވަނީ އެރަށުގެ ދަރިވަރުންނާއި އާންމުންނަށް ޅެން ދަސްކޮށްދިނުމުގެ ޕްރޮގްރާމް ހިންގާފަ އެވެ.
ހާރޭގެ ޅެމެއް
ހާރޭ ބުނަނީ ޅެން ހެދުން ކުރިއަށްގެން ދަނީ ޝައުގުވެރިކަން ހުރުމުގެ އިތުރުން އަދަބީ ކަމެއް ކޮށްދިނުމުގެ ގޮތުން ކަމަށެވެ. އެކިއެކި މުބާރާތްތަކަށް ޅެމާއި ލަވަ ހެދުމަކީ ވެސް އޭނާ ކުރަމުން އަންނަ ކަމެކެވެ. އެގޮތުން ރައްޓެހީން ބުނީމަ ހިލޭ ކޮށްދިން ނަމަވެސް ބައެއް ފަހަރު އަގަށް ވެސް ޅެން ހަދައިދޭކަމަށް ހާރޭ ބުންޏެވެ. ހާރޭ ބުނީ މިކަމުގެ ޝައުގުވެރިކަން ހުންނަ މީހުން މަދު ނަމަވެސް މިހާރު ކޮންމެ ވެސް ވަރަކަށް އިތުރު ވަމުންދާ ކަމަށެވެ. އަދި މިއީ ނުވާވަރުގެ ކަމެއް ނޫން ކަމަށާއި ދަސްކުރުމުގެ ފުރުސަތު ވެސް އެކި ފަރާތްތަކުން ފޯރުކޮށްދެމުން އަންނަ ކަމަށެވެ.
ހާރޭގެ ފޭސްބުކް ޕޭޖްގައި މިހާރު ވެސް އޭނާ ދަނީ ކޮންމެ ދުވަހަކުހެން ޅެމެން ޝާއިއު ކުރަމުންނެވެ. އޭނާ ބުނީ އެންމެ ބޮޑު މަސައްކަތަކަށް މިހާތަނަށް ކުރެވުނީ ބަހާބެހޭ ގައުމީ މަރުކަޒުން އެދިގެން ކުރި މަސައްކަތެއް ކަމަށެވެ. އެއީ ކ. ކާށިދޫގެ ތާރީހާބެހޭ ފޮތެއް ޅެމަކަށް ބަދަލު ކުރުމެވެ. އެމަސައްކަތަށް ގާތްގަނޑަކަށް ހަތަރު ވަރަކަށް ގަޑި ހޭދަވި ކަމަށް އޭނާ ބުންޏެވެ.
ހާރޭ ބުނީ ޅެން ހެދުމުގައި ދެމި ހުރުމަކީ އޭނާ އަށް ލިބޭ ހިތްހަމަ ޖެހުމެއް ކަމަށާއި، އެކަމުގައި ކުރިއަށް ދާނެ ކަމަށެވެ.
