އޭނާގެ މަރަކީ އަދި ކިހިނެތް ހިގައިދިޔަ މަރެއްކަން ފުލުހުން ސާފުކޮށްދީފައި ނުވިނަމަވެސް ނާޖިލާގެ ހަށިގަނޑުން ޒަހަމުތަކެެއް ފެނިފައިވާތީ މިއީ ގުދުރަތީ މަރެއް ނޫންކަންވެސް ވަނީ ޔަގީންވެފައެވެ.
އެ ގެސްޓް ހައުސް ގެ ކަންކަމާއި ހަވާލުވެގެން ހުރި ފަރާތަކުން (ޒާތީ މައުލޫމާތު ހިފެހެެއްޓުމަށް ނަން ސިއްރުކުރެވިފައި) "ސީއެންއެމް”އަށް މައުލޫމާތު ދެއްވަމުން ބުނި ގޮތުގައި، އެ އަންހެން ކުއްޖާ ގެސްޓް ހައުސް އަށް އައީ ބުދަ ދުވަހުގެ ވަގުތެއްގައެވެ.
ގެސްޓުހައުސްއަށް އައި އިރުވެސް އަތުގެ ދެ ތަނެއްގައި ބެންޑޭޖުކޮށްފައިވާކަން ފާހަގަކުރެވުނެވެ. ހަފްތާއެއްހާ ދުވަސް އެތަނުގައި ނާޖިލާ ހޭދަކުރިއިރު، ފަހުން ބެންޑޭޖުގަނޑު ނައްޓާލާފައި ވަނިކޮށް އަތުގެ ދެތަނަކުން ވަޅިއަކުން ނުވަތަ ކަޓަރަކުން އެޅުމުން ލިބޭނެފަދަ ޒަހަމެއްގެ ލަކުނެއް ހުއްޓާ ފެނުނު ކަމަށް އޭނާ ބުންޏެވެ.
ވާހަކަދެއްކުންމަދު ނަމަވެސް ކޮންމެ ދުވަހަކު ކަހަލަ ގޮތަކަށް ގެސްޓުހައުސްގައި އޭނާ ހުންނަ ރޫމުން ބޭރުން ނާޖިލާ ފެނެއެވެ. މޫދަށް ގޮސް ބީޗަށް ގޮސް ހަދައެވެ.
ނަމަވެސް މަރުވި ދުވަހު ފުލުހުންނަށް ރިޕޯޓުކުރީ، އެއްވެސް ވަރަކަށް ބޭރުން ނުފެނުމުންނާއި، ޗެކު އައުޓުވާ ވަގުތު ފާއިތުވެގެންދިޔަތާވެސް އެތައް ވަގުތެއް ވީ ފަހުންވެސް ހަބަރެެއް ނުވުމުންނެވެ.
ސީއެންއެމް އާއި ވާހަކަދެެއްކި ފަރާތް ބުނިގޮތުގައި މަރުވި ރޭގެ ކުރީ ރޭ ވެސް ނާޖިލާއާއި ދިމާވިއެވެ. ނަމަވެސް ހެނދުނު ހޭލިފަހުން އޭނަޔާ ދިމާނުވުމުން ނާއި، ދޮރުގައި ޓަކިދިނުމުންވެސް ހަބަރެެއް ނުވެ، ޗެކް އައުޓްވާ ގަޑި ހަަމަވެ، މެންދުރު ފާއިތުވި އިރުވެސް އޭނާގެ ހަބަރެއް ނުވުމުން ކަމެެެއް ގޯސްވީ ކަމަށް ލަފާ ކުރެވުނީއެވެ.
އެނދުމަތިން ވަޅީގެ ކަވަރެއް، ފާހާނާތެރެއިން 2 ވަޅިއާއިއެކު ނާޖިލާގެ ހަށިގަނޑު!
އޭނާ ކިޔައިދިން ގޮތުން ކޮޓަރި ގިނަ އިރު ނުހުޅުވާ ހުރުމުންނާއި، ނާޖިލާގެ ހަބަރެއް ނުވުމުން ފުލުހުންނަށް އަންގާ، ކޮޓަރި ދޮރު ހުޅުވީ ފުލުހުންގެ ހާޒިރުގައެވެ.
ކޮޓަރި ހުޅުވި އިރު ކޮޓަރީގައި މީހަކު ފެންނާކަށް ނެތެވެ. ނަމަވެސް ކޮޓަރީގެ އެދު މަތީގައި ސިގިރޭޓް ފޮއްޓަކާއި، އޭނާގެ ކޭޝް ކާޑުގެ އިތުރުން، ވަޅިއެއްގެ ކަވަރު ކޮޅެެއް އޮއްވާ ފެނުނެވެ.
އޭނާ ކިޔައިދިން ގޮތުން، ކޮޓަރިން އެއްވެސް މީހަކު ފެންނަން ނެތުމުން ސީންއަށް އެޓެންޑުވި ފުލުހުން ދެން މިސްރާބު ޖެހީ ފާހާނާއަށެވެ.
އޭނާ ބުނި ގޮތުގައި ފާހާނާ ތެރޭގައި ގިނަ އަދަދެއްގެ ލޭތައް ހުރި އިރު، ނާޖިލާގެ ކަރުގައި ވަޅި އަޅާފައިވާ ކަމުގެ ޒަހަމު ހުއްޓެވެ. ނަމަވެސް ސީދާ މީހަކު މަރާލާފައިވަނީ ކަމެެއް ނުވަތަ މަރުވެފައި ވަނީ ކީއްވެ، ކިހިނެތްކަމެއް އޭނާ އަށްވެސް ބުނަން ނޭނގެއެވެ.
ފުލުހުން މިމައްސަލަ ތަހުގީގުކުރުމުންދާއިރު، މަރާއި ގުޅޭގޮތުން ފުލުހުންގެ ފަރާތުން ވަކި އެއްޗެއް ހާމަކޮށްފައެެއް ނުވެއެވެ.
ސީއެންއެމްއިން ފުލުހުންނަށް މިއަދު ގުޅާލުމުންވެސް ވިދާޅުވީ، އިތުރު ތަފްސީލެއް އުޅޭނަމަ ބަލާލާފައި ސާފުކޮށްދޭނެ ކަމަށެވެ. ނަމަވެސް އަދި މިހާތަނަށް އިތުރު މައުލޫމާތެއް ނުދެއެވެ.
މިރޭ ފަތިސް ނަމާދަށް ފަހު ނާޖިލާގެ ޖަނާޒާ ބާއްވާ ގޮތަށް ވަނީ ހަމަޖެހިފައެވެ.
