ބ.ކުޑަރިކިލުގައި މިއަދު ވާހަކަ ދައްކަވަމުން އިންތި ވިދާޅުވީ އެމްޑީޕީން ރައީސް މުހައްމަދު ނަޝީދު ބޭރުކުރަން ބަޔަކު މީހުން އެ އުޅޭ އުޅުމަކީ އެކަކު ވެސް ބަލައިގަންނާނެކަމެއް ނޫން ކަމަށާއި, އެއީ ޕާޓީގެ އެއްވެސް މެންބަރަކު އެދޭނެކަމެއް ވެސް ނޫން ކަމަށެވެ. އަދި މި ޕާޓީއަށް ދެން ވެސް އޮތް އުންމީދަކީ ރައީސް ނަޝީދުކަމަށް އިންތި ވިދާޅުވިއެވެ.
އެހެންކަމުން ރައީސް ނަޝީދު ބާކީކޮށްގެން ޕާޓީއަށް ވެސް މި ގައުމަށް ވެސް ލިބޭނެ މޮޅެއް ނޯންނާނެކަމަށް އިންތި ވިދާޅުވިއެވެ. އިންތި ވަނީ އެ ވިސްނުމުގައި މަސައްކަތް ކުރާ ބަޔަކު އެކަން އެ ގޮތަށް ނުކުރުމަށް ވެސް ގޮވާލައްވާފައެވެ. އަދި ޕާޓީ އެކަތިގަނޑަކަށް ހެދުމަށް ހުރިހާ އެންމެން ވެސް މަސައްކަތް ކުރުމަށް އިންތި ގޮވާލެއްވިއެވެ.
އިންތި ވިދާޅުވީ އޭނާގެ އަމާޒަކީ ޕާޓީ އެކަތިގަނޑަކަށް ހެދުން ކަމަށާއި, އޭނާއަށް އެކަން ކުރެވޭނެ ކަމަށެވެ. ސަބަބަކީ އޭނާއާމެދު މާ ބޮޑަށް ނަފުރަތުކުރާ ބަޔަކު ޕާޓީތެރޭގާ ނުތިބުންކަމަށް އިންތި ވިދާޅުވިއެވެ.
