ސޯޝަލް މީޑިއާގައި އާއްމުވެފައިވާ ސީސީޓީވީ ފުޓޭޖްތަކުން ފެންނަ ގޮތުގައި އައްޑޫގެ ކޮސްމެޓިކްސް ފިހާރައަކަށް މޫނު ނިވާކޮށްގެން ހުރި އެ މީހާ ވަދެފައިވަނީ މިއަދު މެންދުރު 15:04 ހާއިރުއެވެ.
އައްޑޫ ސިޓީ ކައުންސިލުން ބުނީ އެކަމާގުޅޭ މައުލޫމާތެއް އަދި ލިބިފައިނުވާކަމަށެވެ.
ޖުއްބާއަކާއިއެކު ފޮތިގަނޑަކުން މުޅި މޫނު ނިވާކޮށްގެން ހުރި އޭނާ ފުރަތަމަވެސް ފިހާރައަށްވަަދެ އެތަނުގައި ތިބި ދެ އަންހެން ކުދިންނަށް ވަޅިން އިޝާރާތްކޮށް ދުރަށް ޖެހުމަށް ބުނެއެވެ. އަދި އެ ކުދިން ދުރަށް ދިއުމުން ވަތްގަނޑުން ގިނަ އަދަދެއްގެ ރުފިޔާ ހިފައިގެން އޭނާ އަވަސް އަވަހަށް ނިކުމެގެންދާތަން ފެނެއެވެ.
ފުޓޭޖުން ފެންނަ ގޮތުން އެވަގުތު އެތަނުގައި ތިބި ދެކުދިންވެސް ބިރުން އުޅޭ މަންޒަރު ފެނެއެވެ.
މިކަމާއި ގުޅިގެން ފުލުހުންނާއި ސުވާލުކޮށްލުމުން އެ ކަމުގެ ތަފްސީލެއް ބަލާލާފައި ސާފުކޮށްދޭނެ ކަމަށް ވިދާޅުވިނަމަވެސް މިހާތަނަށް އެކަމާއި ބެހޭ ގޮތުން ޖަވާބެެއް ދީފައެއްް ނުވެއެވެ.
