ނަޝީދުގެ ގެކޮޅު ގ. ކެނެރީގެ ހުންނަ ނީލޯފަރު ބަންދުކުރީ މިދިޔަ އަހަރުގެ މޭ މަހު ނަޝީދަށް އަމާޒުކޮށް ދިން ބޮމުގެ ހަމަލާގެ ސަބަބުންނެވެ. ހަމަލާދިނީ އެމަނިކުފާނުގެ ސެކިއުރިޓީ ވަރުގަދަ ނުވުމުގެ ޝަކުވާތަކާއިއެކު، ކެނެރީގެއަށް އެމަނިކުފާނު ވަޑައިގަންނަވާ ވަގުތުތަކުގައި އެމަނިކުފާނު އެގެކޮޅުން ނިކުންނަވަންދެން އެ މަގުގެ އެއްކޮޅުން އަނެއްކޮޅަށް އޮންނަނީ ޓޭޕް ދަމައި ބަންދުކޮށްފަ އެވެ. ދެކޮޅުގައި ސެކިއުރިޓީންވެސް ތިބެއެވެ. އެމަނިކުފާނުގެ ކާރުކޮޅުވެސް އެގޭ ދޮރުމަތީ އޮވެއެވެ.
އެވަގުތަކީ ޓްރެފިކް އެންމެ ބާރުބޮޑުވާ ވަގުތުތަކަށްވާތީ އާއްމުންނަށް އެމަގު ބޭނުން ނުކުރެވޭތީ އެކަމުގެ ޝަކުވާ ރައްޔިތުން މީގެ ކުރިންވެސް ކުރިއެވެ. ނަމަވެސް އަނެއްކާވެސް އެއަޑުތައް އަންނަނީ ގަދަވަމުންނެވެ.
އާއްމުންގެ އެފަދަ ޝަކުވާތަކާއި ބެހޭގޮތުން ބެއެއް ނޫސްތަކުން ރިޕޯޓުކޮށްފައިވާ ބައެއް އާޓިކަލުތަކުގެ ޝްކްރީން ޝޮޓުތަކެއް ހިއްސާކުރައްވާ މިއަދު އީވާ ކުރެއްވި ޓްވީޓެއްގައި ވަނީ އެތެރޭ އިންތިހާބު ތެރޭ، ތަފާތު އެކި ނޫސްތަކަށް ކުއްލިއަކަށް ރައީސް ނަޝީދު ގޭ ގޯޅީގަނޑޭ ކިޔައިގެން އެއްސުރުހީއެއް ލިޔަން ޖެހުނީ، ޝަކުވާއޭ އުނދަގުލޭ، ކިޔައިގެންވެސް އަލުން ސެކިޔުރިޓީ ހަނިކުރަންތޯ ސުވާލު އުފައްދާފަ އެވެ. އަދި އެކަން އެގޮތަށް ކުރަނީ އަނެއްކާ ގޮއްވާލާނެ ޖާގަ ހަދަންތޯވެސް ވަނީ ސުވާލު އުފައްދާފައެވެ.
އީވާ މިގޮތަށް ސުވާލު އުފެއްދެވިއިރު، މިދަނޑިވަޅަކީ އެމްޑީޕީގެ ޗެއާގެ މަގާމަށް ރައީސް ނަޝީދުގެ ފެކްޝަނުން ބޭފުޅަކާއި، ރައީސް ސޯލިހުގެ ފެކްޝަނުން ކުރިމަތި ލައްވާފައިވާ ބޭފުޅުންގެ ކެމްޕެއިންގެ ތެރޭ އެމްޑީޕީގެ އެތެރޭ ހޫނު ވެފައިވާ ދުވަސްވަރެކެވެ. ރައީސް ނަޝީދުގެ ފެކްޝަނުން އިންތި އަށް ތާއީދު ކުރައްވާ ޓީމުގައި އީވާ ހިމެނިވަޑައިގަންނަވައެވެ.
ނީލޯފަރު ހިންގުމަކީ ޗާންދަނީ މަގުގެ އިރުން، އެންމެ ފަސޭހައިން ވެހިކަލްތަކަށް މަޖީދީމަގަށް ނިކުމެވެން އޮންނަ މަގު ކަމަށްވާއިރު، ގިނަ ސްކޫލު ދަރިވަރުން ސްކޫލަށް ވަދެނިކުމެ ހަދާ ވަގުތުތަކުގައި އެ ސަރަހައްދުގެ ޓްރެފިކް ބާރުބޮޑުވާތީ، އެންމެ ފަސޭހައިން މަޖީދީމަގަށް ނިކުންނަން ވެހިކަލްތައް ދަތުރުކުރަނީ އެ މަގުންނެވެ. ނޫސް ރިޕޯޓުތައް މިއަދު ދައުރުވެފައިވަނީ މީގެ ސަބަބުން ރައްޔިތުންނަށް އުނދަގޫ ވާކަމުގެ ޝަކުވާތައް ރައްޔިތުން އަނެއްކާވެސް ކުރަން ފަށާފައިވާ ކަމަށް ބުނެއެވެ.
