ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީގައި އާއިލާއާ ބެހޭ ގާނޫނުގެ 72 ވަނަ މާއްދާގެ ދަށުން އެކުލަވާލާފައިވާ ގަވާއިދާ ހަވާލާ ދެއްވައި ކުޑޫ ވިދާޅުވީ، ކުއްޖާގެ އުމުރުން 18 އަހަރު ފުރެންދެން އެ ކުއްޖާގެ ހަރަދަށާއި ކުއްޖާ ބެލުމުގެ ހަރަދަށް، އެއް ކުއްޖަކު ހުރި ނަމަ 2،000ރ. އަދި އެއް ކުއްޖަކަށް ވުރެ ގިނަ ކުދިން ތިބި ނަމަ އިތުރުވާ ކޮންމެ ކުއްޖަކަށް 1،000ރ. އަށް ވުރެ މަދު ނޫން އަދަދެއް ދޭންވާނެ ކަމަށް ކަނޑައަޅާފައިވާ ކަމަށެވެ.
އޭނާ ވިދާޅުވީ ގަވާއިދުގައި އެ އަދަދު ބަޔާންކޮށްފައި އޮންނާތީ ކޯޓުގެ ދިގު މަރުހަލާތަކަށް ފަހު ވެސް ލިބެނީ ހަމަ އެ އަދަދު ކަމަށެވެ. އޭގެ ސަބަބުން ރޫޅިފައިވާ އާއިލާތަކާއި އެކަނިވެރި މައިންނަށް އުނދަގޫ ކަމަކަށްވެފައިވާ ކަމަށް ކުޑޫ ވިދާޅުވި އެވެ.
އެހެންކަމުން މަޖިލީހުގެ ގަވާއިދު ކޮމިޓީ މެދުވެރިކޮށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުގެ ކަމާ ގުޅުންހުރި ބޭފުޅުންނާ ބައްދަލުކޮށް މި ގަވާއިދަށް ގެންނަން ޖެހޭ ހެޔޮ ބަދަލުތައް ގެނެވޭނެ ގޮތް ހަދައިދިނުމަށް އޭނާ ވަނީ އެދިވަޑައިގެންފަ އެވެ.
އާއިލާއާ ބެހޭ ގާނޫނުގެ 72ވަނަ މާއްދާގައި ވާގޮތުން ކުއްޖާ ބެލެހެއްޓުމުގެ ހަރަދަށް ކޮންމެ މަހަކު 2000 ރުފިޔާ ބައްޕަ ދޭންޖެހެއެވެ. އަދި އިތުރުވާ ކޮންމެ ކުއްޖަކަށް 1000 ރުފިޔާ ދޭންޖެހެ އެވެ.
ފައިސާގެ އިތުރުން ދަރިންނަށް ކޮށްދޭންޖެހޭ ހަރަދުތައް:
- އަހަރަކު ތިން ހެދުން
- އަހަރަކު ދެ ޔުނީފޯމާ އެއް ބޫޓާ ފޮތް ލިސްޓު އަދި ކިޔެވުމަށް ބޭނުންވާ އެހެނިހެން ތަކެތި
- ބޭސް ފަރުވާ
