ކްރިމިނަލް ކޯޓުގެ ހުކުމް ހައިކޯޓުގައި އިސްތިއުނާފުކުރަން އޮންނަ 60 ދުވަހުގެ މުއްދަތު އަންނަ ހަފުތާގެ ނިޔަލަށް ހަމަވާއިރު, ޕްރޮސެކިއުޓާ ޖެނެރަލްގެ އޮފީހުގެ ޕަބްލިކް ޕްރޮސެކިއުޓާ އަދި މީޑިއާ އޮފިޝަލް އަހްމަދު ޝަފީއު މިއަދު ''ސީއެންއެމް'' އަށް ވިދާޅުވީ މި މަހުގެ 17 ވަނަ ދުވަހުގެ ކުރިން އެ މައްސަލަ އިސްތިއުނާފުކުރުމުގެ މަސައްކަތް ކުރައްވަމުން ގެންދަވާ ކަމަށެވެ.
ޔާމީން މަރައިލީ 2017 ވަނަ އަހަރުގެ އޭޕްރީލް މަހުގެ 23 ވަނަ ދުވަހުގެރޭ މެންދަމު އޭނާ ދިރިއުޅޭ ގޭގެ ސިޑި ކައިރީގައި ވަޅިން ހަމަލާދީގެންނެވެ. މި މައްސަލައާއި ގުޅިގެން ހަ މީހެއްގެ މައްޗަށް ގަސްދުގައި މީހަކު މެރުމުގެ ދައުވާ ކުރިއެވެ. އެ ހަ މީހުންނަކީ ހ.އަންނާރުމާގޭ ހައިޝަމް ރަޝީދާއި, މ.އިރާސްމިކުގޭ އަހްމަދު ޒިހާން އިސްމާއީލާއި, ގދ.ގައްދޫ/ސިންދުބާދުގޭ މުހައްމަދު ދިފްރާން އާއި, މ.ކުދެހިގޭ ހަސަން ޝިފާޒާއި, މ.ތާއިފް, އިސްމާއީލް ރަޝީދާއި މ.ކޮޅުފުށި/އީސްޓް, ހުސައިން ޒިޔާދެވެ.
މިދިޔަ ޖަނަވަރީ މަހުގެ 19 ވަނަ ދުވަހު ކްރިމިނަލް ކޯޓުން ވަނީ ޔާމީން މަރައިލިކަން ދެ މީހެއްގެ މައްޗަށް ސާބިތުވާކަމަށް ހުކުމްކޮށްފައެވެ. އެއީ ހައިޝަމް ރަޝީދާއި, އަހްމަދު ޒިހާން އެވެ.
އެ ދެ މީހުންގެ މައްޗަށް ކުށް ސާބިތުވި ނަމަވެސް, ހުރިހާ ވާރިސުން ގިސޯސް ހިފަން ބޭނުންނުވާތީ ހުކުމްކުރީ ގާތިލުން އުމުރަށް ޖަލަށް ލުމަށާއި, 1.3 މިލިއަން ރުފިޔާ މަރުގެ ދިޔައިގެ ގޮތުގައި ނަގައިދިނުމަށެވެ.
ހަމައެހެންމެ ދެ މީހުންގެ މައްޗަށް ކުށް ސާބިތުވިއިރު, ބާކީ ތިބި ހަތަރު މީހުންގެ މައްޗަށް ކުށް ސާބިތުނުވެ ދޫކޮށްލީއެވެ. އެ މީހުން މިނިވަންވުމުގައި ފުލުހުންގެ ތަހްގީގާއި, ދައުވާގައި ހުރި ގޯސްތައް ކްރިމިނަލް ކޯޓުގެ ހުކުމުގައި ފާހަގަކޮށްފައިވެއެވެ. އެ ގޮތުން ތަހްގީގުގައި ފުލުހުން އިހުމާލުވެފައިވާއިރު, ހަތަރު މީހަކު މިނިވަންވުމުގައި ޕީޖީ އޮފީހަށް ފުރުސަތު ދިނުމުން ވެސް އިތުރު ދައުވާއެއް އެ މީހުންގެ މައްޗަށް ނުކުރާކަން ވެސް ފާހަގަކޮށްފައިވެއެވެ.
