މިއަދު އެޑިއުކޭޝަން މިނިސްޓްރީން ސޮއި ކުރެވިގެން ދިޔަ މާޅެންދޫ ސްކޫލް އިމާރާތުގެ މަސައްކަތަކީ، 10 ކުލާސް ރޫމާއި، މަލްޓިޕާޕަސް ހޯލެއް ހިމެނޭހެން ހަދާ ދެބުރީގެ އިމަރާތެއް ކަމަށް އެ މިނިސްޓްރީން ބުނެއެވެ.
އެގޮތުން އެ މަސައްކަތް ހަވާލުކުރެވިގެން ދިޔައީ ސްވިފްޓް އިންޖިނިއަރިން ޕްރައިވެޓް ލިމިޓެޑް އާއެވެ. އެފަރާތުން މި މަސައްކަތަށް ހުށަހަޅުއްވާފައިވާ އަގަކީ 21,190,778.58ރ (އެކާވީސް މިލިއަން އެއްލައްކަ ނުވަދިހަ ހާސް ހަތްސަތޭކަ ހަތްދިހަ އަށް ރުފިޔާ ފަންސާސް އަށް ލާރި) އަށެވެ.
އަދި މި މަސައްކަތް 400 ދުވަހުގެ ތެރޭގައި ނިންމަވައި ދެއްވާނެ ކަމަށް އެ ކުންފުނިން ވަނީ ބުނެފައެވެ.
މާޅޭންދޫ ކައުންސިލް ރައީސް މުހައްމަދު ހަސަން "ސީއެންއެމް" އަށް ވިދާޅުވީ، މާޅެންދޫ ސުކޫލުގައި ހެދުމަށް ނިންމާ މިއަދު ސޮއި ކުރެވުނު އިމާރާތް ހަދަން ހަމަޖެހިފައި ވަނީ މި ވަގުތު ބޭނުންކުރާ، ވަގުތީ ކައުންސިލް އިދާރާގެ ގުޅުވައިގެން ކަމަށެވެ.
އެ އެގްރިމެންޓްގައި މިނިސްޓްރީ އޮފް އެޑިޔުކޭޝަންގެ ފަރާތުން ސޮއި ކުރެއްވީ މިނިސްޓަރު ޑރ. ޢާއިޝަތު ޢަލީ އެވެ. އަދި ސްވިފްޓް އިންޖިނިއަރިން ޕްރައިވެޓް ލިމިޓެޑްގެ ފަރާތުން ސޮއި ކުރެއްވީ މެނޭޖިން ޑިރެކްޓަރު ސައުދުﷲ ހިލްމީ އެވެ.
