މި އެވޯޑް އެކަމަނާ އާ ހަވާލުކުރައްވާފައިވަނީ، 25 އޭޕްރީލް 2022 ގައި ބޭއްވި އައި.އެޗް.ޖީ ޑިޕްލޮމެޓު އޮފް ދަ އިއާ އެވޯޑްސް ހަފްލާގައެވެ. ޑިޕްލޮމެޓް އޮފް ދަ އިއާ އެވޯޑަކީ އިނގިރޭސިވިލާތުގައި ގާއިމުކޮށްފައިވާ 165 އަށްވުރެ ގިނަ ޑިޕްލޮމެޓިކް މިޝަންގެ ޑިޕްލޮމެޓުންގެ ތެރެއިން ވޯޓުލައިގެން ދޭ ވަރަށް ޝަރަފުވެރި އެވޯޑެކެވެ.
ކޮންމެ އަހަރަކުވެސް މި އެވޯޑު ދެނީ 10 ބޭފުޅަކަށެވެ. މިއީ މިއެވޯޑް ދޭތާ 12 ވަނަ އަހަރެވެ.
މި އެވޯޑާއި ހަވާލުވެވަޑައިގަތުމަށްފަހު ޑރ. ފަރަހަނާޒް ދެއްކެވި ވާހަކަފުޅުގައި ވިދާޅުވީ، އެވޯޑް ލިބިވަޑައިގެންނެވި ކަމަށްޓަކައި މާތްﷲ ގެ ހަޒްރަތަށް ހަމްދުކުރައްވައި އިނގިރޭސިވިލާތުގައި ހުންނަ ދިވެހިރާއްޖޭގެ ސަފީރުގެ މަގާމުގައި ހުންނަވައިގެން ރާއްޖެއަށް ހިދުމަތް ކުރެއްވުމުގެ ފުރުސަތު އެކަމަނާއަށް ދެއްވިކަމަށްޓަކައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް ޝުކުރު އަދާކުރައްވާފައެވެ.
އަދި ހަމައެއާއެކު ފޮރިން މިނިސްޓްރު އަބްދުﷲ ޝާހިދު އާއި އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަންގައި މަސައްކަތްކުރައްވާ ޓީމަށް ވަރަށް ހާއްސަ ޝުކުރެއް އެކަމަނާ ރައްދުކުރެއްވިއެވެ.
ޝުކުރުގެ ލިސްޓު ނިންމަވާލެއްވުމުގެ ކުރިން އެކަމަނާގެ އާއިލާގެ ފަރާތްޕުޅުން ލިބިޑައިގަންނަވާ އެހީތެރިކަމާއި އެއްބާރުލެއްވުން ފާހަގަކުރައްވައި ޝުކުރު އަދާކުރެއްވިއެވެ.
