ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރު މޫސާ ސިރާޖް މިހެން ވިދާޅުވީ، ލ. އަތޮޅު ކައްދޫއަށް ޖައްސަން އުޅުނު މޯލްޑިވިއަންގެ ބޯޓެއް ރަންވޭމަތިން ކަހާލުމުގެ ހާދިސާއެއް މިރޭ ހިނގާފައިވަނިކޮށެވެ. މިހާދިސާގައި އެއްވެސް މީހަކަށް އަނިޔާއެއްވެފައެއް ނުވެއެވެ.

ފޮނަދޫ ދާއިރާގެ މެންބަރު މޫސާ ސިރާޖް، ސޯޝަލް މީޑިއާގައި މިރޭ ކުރެއްވި ޕޯސްޓެއްގައި ވިދާޅުވެފައިވަނީ ގިނަ އަދަދެއްގެ ރައްޔިތުންނަށް ބޮޑު އަނިޔާއެއް ލިބުމުގެ ކުރިން ކައްދޫ އެއަޕޯޓަށް ހައްލެއް ހޯދަންޖެހޭ ކަމަށެވެ.

ކައްދޫއަށް ޖައްސަން އުޅުނު މޯލްޑިވިއަންގެ ބޯޓެއް ރަންވޭމަތިން ކަހާލުމުގެ ހާދިސާ ހިނގާފައިވަނީ މިރޭ އިރާކޮޅުއެވެ. މިކަން ހިނގިގޮތް މޯލްޑިވިއަންއިން ދަނީ ބަލަމުންނެވެ. ކައްދޫ އެއާޕޯޓަށް ޖެއްސި ފްލައިޓެއް ކަހާލާފައިމިވަނީ، ރަންވޭގެ ތާރުގަނޑު ހަލާކުވެ ހިލަތައް މައްޗަށް އަރާފައި ހުންނަ އެ އެއާޕޯޓު ރަންވޭގެ ތާރުގަނޑު ހަލާކުވެ ހިލަތައް މައްޗަށް އަރާ، ހާލަތު ވަރަށް ބޮޑަށް ގޯސްވެފައިވާ ކަމުގެ ޝަކުވާ އެކި ފަރާތްތަކުން ކުރަމުން އަންނަ ދަނޑިވަޅެއްގައެވެ.

މިއީ މޯލްޑިވިއަންގެ ފްލައިޓެއްގައި މިފަހުން ހިނގި މިފަދަ ތިންވަނަ ހާދިސާއެވެ. ހަނިމާދޫ އިންޓަނޭޝަނަލް އެއާޕޯޓުން ފުރަން ރެޑީވެފައި އޮތް މޯލްޑިވިއަން ފްލައިޓެއްގެ ކޮކްޕިޓްގައި ރޯވެގެން މިދިޔަ ޖެނުއަރީ މަހުގެ ތެރޭގައިވެސް ފްލައިޓެއް ވަނީ ކެންސަލް ވެފަ އެވެ. އެވަގުތު ބޯޓުގައި 37 ޕެސެންޖަރުންނާއި 3 ކުރޫއިން ތިބި އެ ފްލައިޓުގެ ވިންޑް ޝީލްޑް ތަޅައިގެންގޮސްފައިވެއެވެ. ނަމަވެސް އެއްވެސް މީހަކަށް އެފަހަރުވެސް ގެއްލުމެއް ނުވެއެވެ. 

އަދި ކައްދޫއަށް ޖައްސަން އުޅުމުގެ ތެރޭ ދިމާވި ޓެކްނިކަލް މައްސަލައަކާއި ގުޅިގެން މިދިޔަ އެޕްރީލް މަހުގެ 10ވަނަ ދުވަހު ވެސް ވަނީ މޯލްޑިވިއަންގެ ފްލައިޓެއް އެމަޖެންސީގައި ވެލާނާ އިންޓަނޭޝަނަލް އެއާޕޯޓް(ވީއަައިއޭ) އަށް ޖައްސާފަ އެވެ.