"ސީއެންއެމް" އަށް މައުލޫމާތުދެއްވަމުން ތިނަދޫ ކައުންސިލްގެ ރައީސް ޝިފާގު ހުސެއިން މިއަދު ވިދާޅުވީ ތިނަދޫގެ ރައްޔިތުން މިއަދު އަޑު އުފުލާފައިވަނީ އެރަށު މިސްކިތުގެ ޖާގައިގެ ދަތިކަމާއިހުރެ ނަމާދު ކުރުމަށް އުދަގޫތަކެއް ކުރިމަތިވަމުން އަންނާތީ އެކަން ސަރުކާރުން ހައްލުކޮށްދީފައިނުވާތީ ކަމަށެވެ. އަދި ވިދާޅުވީ އަޑު އުފުލުމުގައި ތިނަދޫގެ ހުރިހާ ރައްޔިތުން ކަހަލަ ގޮތަކަށް ބައިވެރިވެފައިވާ ކަމަށެވެ.
ޝިފާގު ވިދާޅުވީ މިސްކިތުގެ ޖާގައިގެ ދަތިކަމަށް އަވަސް ހައްލެއް ހޯދުމަށް ނިމިގެން ދިޔަ ސަރުކާރުގައިވެސް އެތަކެއް މަސައްކަތްތަކެއް ކޮށްފައިވާނެ ކަމަށާއި، ނަމަވެސް ހައްލެއް މިހާތަނަށް ލިބިފައި ނުވާ ކަމަށެވެ.
މިއަދު ތިނަދޫގައި ކުރި ސުލުހަވެރި އިހުތިޖާޖް----ފޮޓޯ:ސީއެންއެމް
މިހާރު ހުރި މިސްކިތަކީ އަންހެނުންގެ ހާއްސަ މިސްކިތެއްކަން ފާހަގަކޮށް ޝިފާގު ވިދާޅުވީ އެތަނުގައި ނަމާދުކުރުމަށް ހުރީ 45 މީހުންގެ ޖާގައެއް ކަމަށެވެ. އަދި ވިދާޅުވީ ތިނަދޫ އަކީ ގިނަ އަދަދެއްގެ ފަތުރުވެރިން ޒިޔާރަތްކުރާ ރަށަކަށް ވުމުން ރަށުގެ އާބާދީއާއި އެކު ގާތްގަނޑަކަށް 250 އަށްވުރެ ގިނަ މީހުން ނަމާދު ކުރުމަށް އެވަރުގެ ޖާގަ ކުޑަ މިސްކިތެއް ހުރުމުން ރައްޔިތުންގެ ޝަކުވާވެސް ކައުންސިލަށް ލިބެމުން އަންނަ ކަމަށެވެ.
ޝިފާގު ވިދާޅުވީ މި މައްސަލައަށް ހައްލެއް ހޯދުމަށް ކައުންސިލުން މީގެ ކުރިންވެސް އިސްލާމިކު މިނިސްޓްރީ އާއި މަޝްވަރާކޮށްފައިވާނެ ކަމަށާއި، މިނިސްްޓްރީން ތިނަދޫގައި ޖާގަ ތަނަވަސް އިތުރު މިސްކިތެއް އަޅައިދިނުމުގެ މަސައްކަތް ކޮށްދެއްވާނެކަމަށް ކުރިން ވިދާޅުވެފައިވާ ކަމަށެވެ.
މިއަދު ތިނަދޫގައި ކުރި އިހުތިޖާޖުގެ ތެރެއިން--ފޮޓޯ:ސީއެންއެމް
ޝިފާގު ވިދާޅުވީ ކައުންސިލުން އެ މިސްކިތުގެ ބޭރުގައި ފެންޑާއެއްވެސް އަޅައިދީފައިވާ ކަމަށާއި، ނަމަވެސް ޖާގައިގެ ދަތިކަން އަދިވެސް އެބަ އޮތް ކަމަށެވެ.
