މުއާޒު މިހެން ބުނެފައި މިވަނީ، ފިނިފެންމާ ލޯންޗު ގޮއްވާލި ހާދިސާގެ އަޑީގައި ހުރި ކުރީގެ ނައިބު ރައީސް އަހުމަދު އަދީބުގެ ޕާޓީގެ ނައިބު ރައީސް ކަމާއި ހަވާލުވިތާ މަދު ދުވަސްކޮޅެއްގެ ތެރޭގަ އެވެ.
"ރާއްޖެ ޓީވީ" އިން ގެނެސްދިން ޕްރޮގްރާމެއްގައި ބައިވެރިވެ މުއާޒު ދެއްކި ވާހަކަތަކުގައި، އޭނާ ވަނީ ކުރިން ފިނިފެންމާ ލޯންޗާއި ގޮތުން އާއްމުވެފައި ނުވާ ތަފާތު ވާހަކަތައް ހިއްސާ ކޮށްފަ އެވެ.
އެގޮތުން މުއާޒު ބުނީ، ފިނިފެންމާ ލޯންޗު ގޮވި އިރު އޭނާވެސް އެ ލޯންޗުގައި އިން ކަމަށާއި، އެހެން ނަމަވެސް ލޯންޗުތެރެއިން އޭނާ އަށް އަލިފާނުގެ އެއްވެސް ކަމެއް ފެނިފައި ނުވާކަމަށް ވަނީ ބުނެފަ އެވެ.
އެ ވީޑިއޯ އާއި ގުޅިގެން އުމަރު އާއި ސުވާލުކުރުމުން ބުނީ، އެ ވީޑިއޯ އަކީ، ރައީސް އޮފީހުގެ ކެމެރާއަކުން ރެކޯޑް ކޮށްފައި ހުރި ވީޑިއޯއެއް ކަމަށް ބުނި ކަމަށް މުއާޒު ބުންޏެވެ. އަދި އެއީ ފިނިފެންމާ ލޯންޗުގެ ތަހުގީގަށް ރައީސް ޔާމީން އުފެއްދި ކޮމިޝަނަށް ލިބުނު ވީޑިއޯ އެއް ކަމަށްވެސް އުމަރު ބުނި ކަމަށް މުއާޒު ވަނީ ބުނެފަ އެވެ.
ފިނިފެންމާ ލޯންޗުކޮޅު ގޮވި ހާދިސާގެ ވީޑިއޯ އަކީ އެޑިޓެއް ކަމަށް ދޭހަވާގޮތަށް މުއާޒު ވާހަކަ ދައްކާފައި ވާއިރު، އޭނާ ޕްރޮގްރާމުގައި ވާހަކަ ދައްކަމުން އިތުރަށް ބުނީ، ލޯންޗު ގޮވި ދުވަހު ރައީސް ޔާމީން އާއްމުކޮށް ކަންކަން ކުރައްވާ އުސޫލާއި ހިލާފަށް ކަންކަން ކުރި ކަމަށާއި، އެ ދުވަހ އިންނެވީ އާއްމުކޮށް ލޯންޗު ކޮޅުގައި އިންނަވާ ގޮނޑީގައި ނޫން ކަމަށެވެ.
އަދި ފިނިފެންމާ ލޯންޗު ގޮއްވާލުމުގެ ހާދިސާ ހިނގިދުވަހު ރައީސް ޔާމީން ވަނީ އަމިއްލަފުޅަށް ގުޅުއްވާ އެއް ނަންބަރު ފާލަމުގައި ނޫސްވެރިންގެ ބައްދަލުވުމެއް ބޭއްވުމަށް ހަމަޖެއްސެވުމަށް އެދިވަޑައިގެންފައި ކަމަށްވެސް މުއާޒު ވަނީ ބުނެފަ އެވެ.
މީގެ ކުރިންވެސް މުއާޒު ވަނީ މި ހާދިސާ އާއި ގުޅިގެން ތަފާތު އެކި ގޮތްގޮތަށް ވާހަކަ ދައްކާފަ އެވެ. އެ ވާހަކަތަކަށް މީގެ ކުރިން ރައީސް ޔާމީން ވަނީ ރައްދު ދެއްވާ އެ ވާހަކަތަކަކީ ދޮގެއް ކަމަށް ބުނެފަ އެވެ.
