މި ޕްރޮގްރާމުގައި ކައުންސިލްތަކާއި، ޑަބްލިއޫޑީސީ ތައް އަދި އަތޮޅު ކައުންސިލްތަކަށް ދިމާވާ މައްސަލަ ތަކާއި، ހުރި ގޮންޖެހުނަތަކުގެ މައްޗަށް ހައްލު ހޯދުމަށް ރައީސުލް ޖުމްހޫރިއްޔާ އާއެކު މަޝްވަރާ ކުރެވޭނެ އެވެ.
"ސީއެންއެމް" އަށް މައުލޫމާތުދެއްވަމުން ރައީސްގެ ތަރުޖަމާން މަބްރޫކު އަޒީޒް ވިދާޅުވީ ކައުންސިލްތަކާއެކު މާދަމާ ބާއްވާ މަހާސިންތާގައި ރައީސް އިބްރާހިމް މުހައްމަދު ސޯލިހު ބައިވެރިވުމަށް ހަމަޖެހިފައިވާ ކަމަށެވެ.
"ވިޔަވަތި ޕްރޮގްރާމް"ގެ ދަށުން މިދިޔަ އަހަރުވެސް ރައީސް ވަނީ ކައުންސިލް ތަކާއި، ޑަބްލިއޫޑީސީ ތަކާއެކު ފުރަތަމަ ބައްދަލުވުން ކްރޮސް ރޯޑްގައި ބާއްވާފަ އެވެ.
މަބްރޫކް ވިދާޅުވީ މި ކޮންފަރެންސް ނުވަތަ މަހާސިންތާ ކުރިއަށް ގެންދަން ހަމަޖެހިފައިވަނީ ދެ ދުވަހުގެ މުއްދަތަކަށް ކަމަށެވެ. އަދި ވިދާޅުވީ މާދަމާ ފެށުމަށް ހަމަޖެހިފައިވަނީ ވިޔަވަތި ޕްރޮގްރާމުގެ ދެވަނަ ކޮންފަރެންސް ކަމަށެވެ.
ކޮވިޑްގެ ހާލަތާއި ގުޅިގެން މިދިޔަ އަހަރުގެ ކޮންފަރެންސް ބޭއްވިފައިނުވާކަން ފާހަގަކުރައްވަމުން މަބްރޫކް ވިދާޅުވީ އެންމެ ފަހުން ކައުންސިލްތަކާއިއެކު ބޭއްވި ކޮންފަރެންސްގެ ނަތީޖާވެސް ރަގަޅު ކަމަށެވެ.
ވިޔަވަތި ޕްރޮގްރާމަކީ ލާމަރުކަޒީ ނިޒާމުގެ ތެރެއިން އުފައްދާފައިވާ ރަށްރަށުގެ ރަށު ކައުންސިލްތަކާއި، އަތޮޅު ކައުންސިލްތަކުގެ އިތުރުން ޑަބްލިއޫޑީސީ އާއި މިފަރާތްތަކުގެ ބެލެނިވެރި ފަރާތް ކަމުގައިވާ ލޯކަލް ގަވަރމަންޓް އޮތޯރިޓީ ބައިވެރިވެގެން ކުރިއަށްގެންދާ ޕްރޮގްރާމެކެވެ.
