އިއްޔެ އއ. އުކުޅަހުގައި ބޭއްވުނު "ވިއަވަތި ރާއްޖޭ" ލާމަރުކަޒީ ނިޒާމު ކޮންފަރެންސްގެ ފުރަތަމަ ސެޝަންގައި ބައިވެރި ކައުންސިލް ތަކުން ވަނީ ކައުންސިލްތަކަށް އާމްދަނީ ހޯދުމަށް ހުރި ހުރަސްތަކާއި ބެހޭ ގޮތުން ފުޅާ ދާއިރާއެއްގައި ވާހަކަ ދައްކާފަ އެވެ. އަދި ކައުންސިލް ތަކުން ވަނީ ހުރި ގޮންޖެހުންތައް ފާހަގަކޮށް ސަރުކާރަށް ކަރުދާހެއް ހުށަހަޅާފަ އެވެ.
މި ކަމާއި ގުޅިގެން މި ކޮންފަރެންސްގައި އެންވާރަމަންޓު މިނިސްޓަރު އައިޝަތް ޝައުނާ ދެއްކެވި ވާހަކަފުޅުގައި ވިދާޅުވީ، ގްރީން ޓެކްސްގެ ގޮތުގައި ދައުލަތަށް ލިބޭ އާމްދަނީ ރަށްރަށް ލިބޭގޮތަށް އަންނަ އަހަރުގެ ބަޖެޓުގައި ކަނޑައަޅުއްވައި ދެއްވާނެކަމަށެވެ.
ދެހާސް ސޯޅަ ވަނަ އަހަރުން ފެށިގެން ރާއްޖެއަށް ފަތުރުވެރިންގެ އަތުން ގްރީން ޓެކްސް ދައުލަތުން އަންނަނީ ނަގަމުންނެވެ. އެގޮތުން ރިސޯޓު، ސަފާރީ އަދި ހޮޓާތަކުގައި ޗުއްޓީ ހޭދަކުރާ ކޮންމެ ފަތުރުވެރިއެއްގެ އަތުން ދުވާލަކު ގްރީން ޓެކްސްގެ ގޮތުގައި ހަ ޑޮލަރު ނަގަ އެވެ.
އަދި ގެސްޓު ހައުސްތަކުގައި ތިބޭ ފަތުރުވެރިންގެ އަތުން ދުވާލަކަ ތިން ޑޮލަރު ގްރީން ޓެކްސްގެ ގޮތުގައި ދައުލަތައް ނަގަ އެވެ.
