"ސީއެންއެމް" އަށް މައުލޫމާތުދެއްވަމުން ށ.ފޭދޫ ކައުންސިލްގެ ރައީސް އަހުމަދު ރައިސަމް މިއަދު ވިދާޅުވީ އެ މައްސަލައިގައި އިއްޔެ ހައްޔަރު ކުރި މީހާގެ ބަންދާ މެދު ގޮތެއް ނިންމުމަށް މިއަދު ށ. ފީވަކު ކޯޓަށް އޭނާ ހާޒިރު ކުރުމުން އޭނާގެ ބަންދަށް 15 ދުވަސް ޖަހާފައިވާ ކަމަށެވެ.
ހައްޔަރުކޮށްފައިވަނީ ށ.ފޭދޫ ރެޑިއަމްގެ އާދަމް ކިޔާ މީހެކެވެ. އެނގިފައިވާ ގޮތުގައި ވަޅިޖެހި އާދަމް އަކީ 37 އަހަރުގެ މީހެކެވެ. އަދި އޭނާގެ އަނބިމީހާ އަކީ 30 އަހަރުގެ މީހެކެވެ.
ރައިސަމް ވިދާޅުވީ ހައްޔަރުކޮށްފައިވާ މި ފިރިހެންމީހާ އަކީ ރުޅިގަދަ މީހެއް ކަމަށާއި، ރުޅި ކޮންޓްރޯލް ނުކުރެވިގެން ގޮސް މިފަދަ އަމަލުތައް ހިންގަން މީގެ ކުރިން ވެސް މަސައްކަތް ކޮށްފައިވާ ކަމަށެވެ.
މި ހާދިސާ ހިނގާފައިވަނީ ހުކުރު ދުވަހުގެ ހެނދުނު އެވެ. މައުލޫމާތ ލިބިފައިވާ ގޮތުގައި މި ހާދިސާ ހިނގައިގެން އެތަނަށް މީހުން އެއްވި އިރުވެސް ފިރިމީހާ ހުރީ ވަޅި ހިފައިގެންނެވެ.
މި ހާދިސާގައި އަންހެންމީހާއަށް މާބޮޑު ސީރިއަސް އަނިޔާތަކެއް ލިބިފައެއް ނުވެ އެވެ. ނަމަވެސް މި ފިރިހެންމީހާގެ ފަރާތުން މީގެ ކުރިންވެސް މިފަދަ އަނިޔާއެއް އަންހެން މީހާއަށް ކޮށްފައިވާކަމަށް އެރަށު ކައުންސިލުން ފާހަގަ ކުރި އެވެ.
