ދިރާގުން ބުނީ، މި ދެ ހިދުމަތާ އެކު، ނައިވާދޫ ރައްޔިތުންނަށް ހާއްސަ އޮފާތަކެއް ލިބިގެން ދާނެ ކަމަށެވެ. އެގޮތުން ބްރޯޑްބޭންޑްގެ ހިދުމަތަށް އެދޭ ފަރާތްތަކަށް ފައިބާ ކޭބަލް ގުޅައިދިނުމާ އެކު އެއަށް ބޭނުންވާ ރައުޓާ ހިލޭ ދޫކުރުމަށް ހަމަޖެހިފައި ވާކަމަށެވެ.
ދިރާގުން ބުނިގޮތުގައި، މި ހިދުމަތާ އެކު އެ ރަށަށް ހަލުވި ސްޕީޑެއްގައި އިންޓަނެޓް ލިބޭނެ އެވެ. އަދި ބޮޑެތި ޑާޓާ އެލަވެންސްތައް ލިބޭ ތަފާތު ޕެކޭޖުތައް ވެސް ލިބޭނެ ކަމަށް ދިރާގުން ބުނެ އެވެ.
ދިރާގު ޓީވީ އަށް އެޕްލައި ކުރާ ފަރާތްތަކަށް ވެސް، ހިލޭ ޑިކޯޑަރު ލިބޭނެ ކަމަށް ދިރާގުން ބުނެ އެވެ. މުނިފޫހިފިލުވުމުގެ އެކި ކޮންޓެންޓާ އެކު ދިރާގު ޓީވީން 100 އަށް ވުރެ ގިނަ ޗެނަލް ފޯރުކޮށްދެ އެވެ.
ދިރާގު ފައިބާ ބްރޯޑް ބޭންޑް ހިދުމަތް ރާއްޖޭގެ ގޭބީސީތަކުގެ 84 އިންސައްތަ އަށް މިހާރު ވެސް އަންނަނީ ފޯރުކޮށްދެމުންނެވެ. އޭގެ ތެރޭގައި 85 ރަށެއް ހިމެނެއެވެ. އަދި ރާއްޖޭގައި މީހުން ދިރިއުޅޭ 84 ޕަސެންޓް ރަށަށް ދިރާގު ޓީވީގެ ހިދުމަތް ވަނީ ފޯރުކޮށްދީފަ އެވެ.
