ދުނިޔޭގެ ބާޒާރުގައި ތެލުގެ އަގަށް އައި ބަދަލާއި ގުޅިގެން އެސްޓިއޯއިން ތެޔޮ ވިއްކާ އަގުތަކަށް ވަނީ މިދިޔަ ބުރާސްފަތި ދުވަހު ބަދަލުތަކެއް ގެނެސްފަ އެވެ.
ޓެކްސީ ހިދުމަތްދޭ ޕިކް އެންޑް ޑްރޮޕް ޓެކްސީ ސެންޓަރުން ބުނީ ރާއްޖޭގައި ވެސް ތެލާއި ތަކެތީގެ އަގުތައް އަތް ނުފޯރާ ފަށަށް މައްޗަށް ދިއުމުގެ އަސަރު އެންމެ ބޮޑަށް ކުރާ އެއް ބަޔަކީ ޓެކްސީ ޑްރައިވަރުންކަމަށާއި އެހެން ވުމުގެ ސަބަބުން ޓެކްސީ ކުރާ ފަރާތްތަކަށް ފޫ ނުބެއްދޭ ވަރުގެ ގެއްލުމާއި ކުރިމަތިލާން ޖެހިފައިވާ ކަމަށެވެ.
އެ ސެންޓަރުން ބުނީ ސަރުކާރުން ޓެކްސީ ދަތުރުތަކުގެ އަގު ކޮންޓްރޯލްކުރިއިރު ލީޓަރެއްގެ އަގު 8.07 ރ އަށް ހުރި ނަމަވެސް ޕެޓްރޯލް ލީޓަރެއް މިހާރު ލިބެނީ 16.55ރ އަށް ކަމަށެވެ. އެގޮތުން ޕެޓްރޯލް ލީޓަރަކުން 8ރ ބޮޑުވެގެން ދިޔައިރު ދަތުރުތަކުގެ އަގަށް ބަދަލެއް ނުގެނެސް އޮތުމަކީ އެ ސެންޓަރުގެ ވަރަށް ބޮޑު ކަންބޮޑުވުމެއް ކަމަށެވެ.
ޓްރާންސްޕޯޓް މިނިސްޓްރީގައި ރަޖިސްޓްރީ ކޮށްގެން މާލޭގައި ޓެކްސީ ހިދުމަތްދޭ 10 ސެންޓަރު ހުރެ އެވެ. އަދި ހުޅުމާލޭގައި ޓެކްސީ ހިދުމަތްދޭ ތިން ސެންޓަރު ހުރެ އެވެ.
