އުދައްޔުގެ މަރާއި ގުޅިގެން މިއަދު ކްރިމިނަލް ކޯޓުގައި އޮތް އަޑުއެހުމުގައި ވަނީ ޕޯސްޕޯޓަމް ރިޕޯޓް ތައްޔާރުކުރި ފަރާތްތަކުގެ ހެކެބަސް ނެގުމެވެ.
ތޫނު އެއްޗަކުން ހަމަލާދީ ގުރޫޕަކުން އުދައްޔު މަރާލާފައިވަނީ މިދިޔަ އަހަރުގެ ފެބްރުއަރީ މަހުގެ އަށްވަނަ ދުވަހުގަ އެވެ.
މިމައްސަލަ އާއި ގުޅިގެން ފުލުހުން ހިންގި ތަހުގީގުގައި ތިން މީހަކާއި ކުޑަކުއްޖަކު ހައްޔަރުކޮށްފައި ވެ އެވެ.
ދައުލަތުން ގަސްތުގައި މީހަކު މަރާލި މައްސަލަ އާއި ގުޅިގެން ދައުވާ އުފުލާފައިވާ ތިން މީހުންނަކީ ގއ. މާމެންދޫ، ރިހިފަރުދާގެ، އަހުމަދު ޝަމީމް އާއި، ގއ. މާމެންދޫ، ބިލަތްމާގެ، ޝަރަފު ރަޝީދާއި ގއ. މާމެންދޫ، ގުލްފާމުގެ، މުހައްމަދު މާޒިންގެ މައްޗަށެވެ. އުމުރުން 18 އަހަރު ނުފުރޭ ކުޑަ ކުއްޖަކަށްވެސް ދައުވާކުރާއިރު އެކުއްޖާގެ އެއްވެސް މައުލޫމާތެއް އެއްވެސް ތާކުން ހާމައެއް ނުކުރެ އެވެ.
އުދައްޔު: ފޮޓޯ އާއިލާ
ކްރިމިނަލް ކޯޓުގައި ހެކިވެރިޔާ މިއަދު ބުނީ އުދައްޔު މަރާލުމަށް އަދި ފުރާނައަށް ނުރައްކާވާގޮތައް ހުރި ޒަހަމްތަކަކީ ހަށިގަނޑުގެ ފުރަގަހުން މެޔާއި ދިމާއަށް ލިބިފައިވާ ޒަހަމް ތަކެއް ކަމަށެވެ. އަދި ބުނީ އުދައްޔުގެ ހިތުގެ މައި ލޭހޮޅި އޮތީ ކަނޑައިގެން ގޮސްފައިކަން ޕޯސްޓްމޯޓަމް ރިޕޯޓުންވެސް ފެންނަ ކަމަށެވެ.
އުދައްޔު މަރުވެފައިވަނީ އޭނާއަށް ދިން ޒަހަމް ތަކުގެ ސަބަބުން ހިތުގެ މައި ލޭ ހޮޅި ކަނޑައިގެން ގޮސް ފުއްޕާމެއަށް ލޭ އެޅިގެން ކަމަށެވެ. އަދި މި ހަމަލާގައި މޭކަށިތައްވެސް ހަލާކުވެފައިވާ ކަމަށެވެ.
އުދައްޔު، 17، ގއ. މާމެންދޫ
މިމައްސަލަ އާޢި ގުޅިގެން ކޯޓުގައި މިދިޔަ މަހުގެ 22 ވަނަ ދުވަހު ބޭއްވި އަޑުއެހުމުގައި އުދައްޔު މަރާލި ގޮތް ދައުލަތުގެ ވަކީލުން ވަނީ ކޯޓުގައި ކިޔައިދީފަ އެވެ. އުދައްޔު މަރާލާފައިވަނީ ވަޅި އާއި ލަޓިބުރި އަދި ކީސް ބޭނުންކޮށްގެން ކަމަށެވެ.
އެންމެ ފަހުން ކޯޓުގައި ތިންމީހުންގެ ފަރާތުން ފާހަގަކުރި ކަންކަން
ޝަމީމްގެ ބުނީ، އެ ހާދިސާ ހިނގާފައިވަނީ އޭނާގެ ގެ ކައިރީގައި ކަމަށާއި، އެހެންކަމުން އޭނާ އެތަނުގައި ހުއްޓާ ފެނިދާނެ ކަމަށެވެ. ނަމަވެސް އޭނާ މާރާމާރީ ހިންގިކަން ނުވަތަ އެކަމުގައި ބައިވެރިވިކަމަށް އެއްވެސް މީހަކު ބަޔާންދީފަ ނުވާ ކަމަށެވެ.
މާޒިން ބުނީ އުދައްޔު ގަޔަށް ވަޅި ހެރިކަމުގެ ދައުވާ އުފުލާފައިވަނީ އޭނާގެ ކޮއްކޮ ކަމަށާއި، ކޮއްކޮ އާއި މެދު މީހަކު މާރާމާރީ ހިންގާތަން ބަލަން ނުހުރެވޭނެ ކަމަށެވެ. އެކަމަކު އެމަންޒަރު ފެނުނު މީހުންނަށް ސިފަވާ ގޮތް ތަފާތުވެދާނެ ކަމަށާއި، އެއީ އޭނާގެ ވެސް ގެ ކައިރިވުމުން ކުށުގެ ވެށިން އޭނާ ފެނިދާނެ ކަމަށެވެ. ނަމަވެސް އޭނާގެ ކުށެއް ނެތްކަން ސާބިތުވާނެ ކަމަށް މާޒިން ބުންޏެވެ.
ޝަރަފުވެސް ބުނެފައިވަނީ އެއީ އޭނާގެ މައްޗަށް ކުރެވޭނެ ދައުވާއެއް ނޫން ކަމަށާއި އޭނާއަކީވެސް މައުސޫމު މީހެއް ކަމަށެވެ. އަދި އެކަން ލިއެކިޔުންތަކުން ސާބިތުވާނެ ކަމަށެވެ.
