އިލެކްޝަން ކޮމިޝަނުގެ ދަފްތަރުގައި ޖުމްލަ 11 ސިޔާސީ ޕާޓީއެއްް ރަޖިސްޓްރީކޮށްފައިވެ އެވެ. ނަމަވެސް އޭގެ ތެރެއިން ފައިސާ ލިބެނީ ޖުމްލަ ހަތަރު ޕާޓީއަކަށެވެ. އެމްއެންޕީ އަކީ އަދި ފައިސާ ލިބޭ ޕާޓީއެއް ނޫނެވެ.
އެމްއެންޕީގެ ނައިބްރައީސް ރައްޔިތުންގެ މަޖިލީހުގެ ކިނބިދޫ ދާއިރާގެ މެންބަރު އަބުދުﷲ ރިޔާޒް ވިދާޅުވީ ސިޔާސީ ޕާޓީތަކަށް ސަރުކާރުން ހޭދަކުރާ ފައިސާ އަކީ ބޮޑު އިސްރާފެއް ކަމަށް އެޕާޓީން ދެކޭ ކަމަށެވެ.
ރިޔާޒް ވިދާޅުވީ ދައުލަތުގެ ބަޖެޓުން ކުރާ މިފަދަ އިސްރާފުތައް ހުއްޓާލަންޖެހޭ ކަމަށެވެ. އަދި ފަންޑްރައިސް ކޮށްގެން ސިޔާސީ ޕާޓީތައް ހިންގެންޖެހޭނެ ކަމަށް ގަބޫލުކުރައްވާ ކަމަށެވެ.
އިލެކްޝަން ކޮމިޝަނުގެ ރައީސް ފުއާދު ތައުފީގު މިއަދު ވިދާޅުވީ ސިޔާސީ ޕާޓީތަކުގެ ގާނޫނަށް ބަދަލު ގެންނަން ބަންޑާރަ ނައިބުގެ އޮފީހާއި މިހާރު މަޝްވަރާ ކުރައްވަމުން އަންނަ ކަމަށެވެ.
ފުއާދު ވިދާޅުވީ ސިޔާސީ ޕާޓީތަކަށް ފައިސާދޭ އުސޫލަށް ބަދަލުގެންނަން މަސައްކަތް ކުރައްވަމުން އަންނަ ކަމަށެވެ.
އެގޮތުން ޕާޓީތަކަށް ފައިސާ ދޭ އުސޫލުގެ ތެރެއިން ވިހި ޕަސެންޓް ފައިސާ ޕާޓީތަކަށް ދިނުމަށް މަޝްވަރާ ކުރަމުންދާ ކަމަށާއި، ނުވަތަ ފައިސާ ދިނުން ހުއްޓާލުމަށްވެސް މަޝްވަރާ ކުރަމުންދާ ކަމަށެވެ.
