ކުޑަކުއްޖަކަށް ޖިންސީ ގޯނާ ކުރި ކަމަށް ބުނެ ދިއްފުށީ ބަޔަކު އަނިޔާ ކުރި މީހާ އަށް ވަނީ ވަރަށް ބޮޑެތި އަނިޔާތައް ވެފަ އެވެ. އެގޮތުން އޭނާގެ މޫނު މަތި ދުޅަވެފައި ވާއިރު އެނާގެ ވާތު ލޮލަށް ވެސް ވަނީ ގެއްލުން ވެފަ އެވެ.
އަނިޔާ ލިބުނު މީހާގެ ވީޑިއޯ އެއް ސޯޝަލް މީޑިއާގައި އާއްމު ވެފައިވާއިރު، އޭނާ ވަނީ މިއީ އޭނާގެ އަންހެނުންގެ ކުރީގެ ފިރިމީހާގެ އާއިލާ މީހުން ކުރި ކަމެއް ކަމަށް ބުނެފަ އެވެ. އަދި އޭނާ ގައިގައި އެރަށު ބަޔަކު ތަޅަމުން ދިޔައިރު އެތަނުގައި ތިބި ފުލުހުން އޭނާއަށް ހިމާޔަތް ދީފައި ނުވާކަމަށް ވެސް އޭނާ ވަނީ ބުނެފަ އެވެ.
އޭނާއަށް އަނިޔާ ކުރަމުން ހޮސްޕިޓަލާއި ހަމައަށް ގެންގޮސް، ހޮސްޕިޓަލަށް ވައްދާ ކުއްޖާއާއި ބެހުނު ކަމަށް އެއްބަސްވުމަށް އޭނާއަށް އަނިޔާ ކުރި މީހުން ބުނި ކަމަށާއި، އެކަމަށް އެއްބަސް ނުވުމުން ހޮސްޕިޓަލުން ނެރެ އަނެއްކާވެސް އޭނާއަށް އަނިޔާ ކުރަމުން ދިޔަ ކަމަށް އޭނާ ބުންޏެވެ. އެގޮތަށް އަނިޔާ ކުރަމުން ދަނިކޮށް ފުލުހުން އެތަނަށް އައިސް ކޮންމެވެސް ވަރަކަށް އެމީހުން ހުއްޓުވަން މަސައްކަތް ކުރި ކަމަށާއި، އެހެންނަމަވެސް ކުޑަ ވަގުތުކޮޅަކަށް ފަހު އަނެއްކާވެސް އޭނާއަށް އެމީހުން އަނިޔާ ކުރަން ފެށިކަމަށް އޭނާ ބުންޏެވެ.
މީގެ އިތުރުން އޭނާ ބުނީ، އިތުރު ފުލުހެއްގެ ކިބައިން ފޯނު ކޯލަކަށް އެދުމުން އެކަމަށް ވެސް ހުރަސް އެޅި ކަމަށާއި، ހޮސްޕިޓަލްގައި ތިބި މީހުންގެ ކައިރިން ފަރުވާ ހޯދުމަށް އެދުމުން ފަރުވާ ދިނުމަށް ދެކޮޅު ހެދި ކަމަށެވެ. އަދި ފަރުވާ ހޯދުމަށް އެހެން ތާކަށް ދިއުމަށް ބުނި ކަމަށް އޭނާ ބުންޏެވެ.
އޭނާއަށް ހޭ ވެރިކަން އައީ އަންހެނުން އައިސް ގޮވުމުން ކަމަށާއި، އޭރުވެސް އޭނާއަށް އަނިޔާ ކުރަމުން ދިޔަ ކަމަށް އެމިހާ ބުންޏެވެ. އޭރު އޭނާއަށް އެމީހުން އަނިޔާ ކުރަމުން ދިޔަތާ ތިން ގަޑިއިރު ވެދާނެ ކަމަށާއި، ފަރުވާއެއް ލިބުނީ އޭގެ ފަހުން ކަމަށް އޭނާ ބުންޏެވެ. އޭގެ ފަހުން މާލެއިން އެރަށް ދިޔަ ފުލުހުންގެ ހިމާޔަތުގެ ދަށުން މާލެ އައި ކަމަށް އެމީހާ ބުންޏެވެ.
މިކަމާއި ގުޅިގެން ފުލުހުންގެ ބަހެއް އަދި ވަނީ ލިބޭގޮތް ނުވެފަ އެވެ. އެހެންނަމަވެސް ފުލުހުން މީގެ ކުރިން ބުނީ، ކުޑަކުއްޖަކަށް ޖިންސީ ގޯނާކުރި މައްސަލާގެ އިތުރުން އެކަން ކުރިކަމަށް ތުހުމަތުކޮށް މީހަކަށް އަނިޔާކުރި މައްސަލަވެސް ފުލުހުން ދަނީ ބަލަމުން ކަމަށެވެ.
