އެންވަރަޔަމެންޓް ޕްރޮޓެކްޝަން އެޖެންސީ (އީޕީއޭ)އިން ބުނީ މި ދެ ދޫނި ފުލުހުންގެ އެހީތެރިކަމާއެކު އަތުލާފައި ވަނީ ވ.އަތޮޅުން ކަމަށެވެ. ނަމަވެސް އެއީ ވ.އަތޮޅުގެ ކޮން ރަށެއްކަން އީޕީއޭއިން ހާމަކޮށްފައެއް ނުވެ އެވެ.
އީޕީއޭއިން މި ދެދޫނި އަތުލުމަށްފަހު އަތިރި މައްޗަށް ދޫކޮށްލާ މަންޒަރުގެ ވީޑިއޯ އާއި ފޮޓީވެސް ވަނީ އާންމުކޮށްފަ އެވެ. އަދި މިފަދަ އަމަލުތައް އާންމުންގެ ފަރާތުން ނުހިންގުމަށްވެސް އީޕީއޭއިން ވަނީ އިލްތިމާސް ކުރައްވާފަ އެވެ.
އީޕީއޭ އިން ސަލާމަތް ކުރި ދޫނި ދޫކޮށްލާފައި..
މި ދެ ދޫންޏަކީ 'ބްރަހްމިނީ ކައިޓް' އަދި 'ގްލޮސީ އައިބިސް' އާއިލާއަށް ނިސްބަތްވާ ދެ ދޫނި ކަމަށް އީޕީއޭއިން ވަނީ ބުނެފަ އެވެ.
ކަނޑުމަތީގައި އުޅޭ ދޫނި ތަކާއި، މޫސުމީ ދޫނިތަކުގެ ގޮތުގައި ރާއްޖޭއަށް އަންނަ އެއްވެސް ބާވަތެއްގެ ދޫންޏެއް ހިފައިގެން ގެންގުޅުން ނުވަތަ އެ ތަކެއްޗަށް އަނިޔާ ކުރުމަކީ ދިރޭ ތަކެތި ރައްކާތެރި ކުރުމުގެ ގާނޫނުގައި މަނާ ކަމެކެވެ.
އެގޮތުން 20،000 ރުފިޔާ އާއި 25،000 ރުފިޔާގެ އަދަދަކުން ޖޫރިމަނާކުރެވިދާނެ ކަމަށްވެސް ގާނޫނުގައި ބުނެފައިވެ އެވެ.
އަދި ހިމާޔަތް ކޮށްފައިވާ ދިރޭ ތަކެއްޗަށް ގޯނާކޮށް ނުވަތަ އަނިޔާ ކުރާނަމަ 30،000 ރުފިޔާ އާއި 50،000 ރުފިޔާގެ އަދަދަކުން އެމީހަކު ޖޫރިމަނާ ކުރެވިދާނެ ކަމަށެވެ.
