އެމެރިކާއިން ހަދިޔާ ކުރި ވެކްސިން ތައް ހަދިޔާ ކޮށްފައިވަނީ، މިއަދު ހެލްތު މިނިސްޓްރީގައި ކުރިއަށް ދިޔަ ރަސްމީޔާތެއްގަ އެވެ. މީގެ ކުރިންވެސް އެމެރިކާއިން ވަނީ ރާއްޖެއަށް 100،620 ފައިޒާ ޑޯޒް ވެކްސިން ހަދިޔާ ކޮށްފަ އެވެ.
މިއަދު އެމެރިކާއިން ރާއްޖެއަށް ހަދިޔާ ކުރީ، ފައިޒާ އާއި މޮޑާނާގެ ޑޯޒްތައް ހިމެނޭ ގޮތަށް ޖުމްލަ 99،450 ވެކްސިން ޑޯޒް ކަމަށް ހެލްތު މިނިސްޓްރީން ވަނީ މައުލޫމާތު ދީފަ އެވެ.
އެމެރިކާއިން އަންނަނީ ސިއްހީ ގޮތުން ރާއްޖެއަށް ގިނަ އެހީތެރިކަމެއް ފޯރު ކޮށްދެމުންނެވެ. އެގޮތުން ކޮވިޑް-19 ގެ ތެރޭ އެމެރިކާއިން ވަނީ ރާއްޖެއަށް 60 ވެންޓިލޭޓަރުވެސް ހަދިޔާ ކޮށްފަ އެވެ. މީގެ އިތުރުން އެގައުމުން ވަނީ ރާއްޖެއަށް މި ބަލިމަޑުކަމުން އަރައިގަތުމަށް ހަތް މިލިއަން ޑޮލަރުގެ އެހީވެސް މީގެ ކުރިން ދީފަ އެވެ.
އެމެރިކާއިން ރާއްޖެއަށް ވެކްސިން ހަދިޔާ ކޮށްފައި ވާއިރު، ފަހަކަށް އައިސް ރާއްޖެއިން މިބަލި ޖެހޭ މީހުންގެ އަދަދު ވަރަށް ބޮޑަށް ދަށްވެފައި ވާކަމަށް އެޗްޕީއޭގެ ހިސާބުތަކުން ދައްކަ އެވެ. އެގޮތުން ފާއިތުވެދިޔަ ހަފްތާގައި ރާއްޖެއިން މިބަލި ޖެހުނީ 106 މީހަކަށް ކަމަށް އެޗްޕީއޭއިން ވަނީ ބުނެފަ އެވެ.
