އެކައުންސިލުން މިހެން ބުނެފައި ވަނީ، ރައީސް އިބްރާހިމް މުހައްމަދު ސޯލިހް ފީވަކު ކައުންސިލާ ބައްދަލުކުރައްވައި އެރަށުގެ ތަރައްގީއަށް ކުރެވެމުންދާ މަސައްކަތްތަކާ ރައްޔިތުންނަށް ދިމާވެފައިވާ ދަތިތަކާ ގުޅޭ ގޮތުން މަޝްވަރާ ކުރުމަށް މިއަދު ރައީސް އޮފީހުގައި ބޭއްވި ބައްދަލުވުމުގައި ދެއްކި ވާހަކައިގަ އެވެ.
ފީވަކު ކައުންސިލުން ވަނީ، އެރަށް އުމުރާނީ ގޮތުންނާއި އިގުތިސާދީ ގޮތުން އަދި، އިޖުތިމާއީ ގޮތުން ތަރައްގީވާން ފަށާފައި ވަނީ މިސަރުކާރުގެ މިފާއިތުވި ހަތަރު އަހަރުގެ ތެރޭގައިކަން ފާހަގަ ކޮށްފަ އެވެ. އަދި އެކަމަށްޓަކައި ރައީސް ސޯލިހު އަށާއި، ސަރުކާރަށް ކައުންސިލްގެ ފަރާތުން ވަނީ ޝުކުރު ދަންނަވާފަ އެވެ.
ރައީސް ސޯލިހު ވަނީ، ސަރުކާރުން ފީވަކުގައި ކުރިޔަށް ގެންދާ ކަންކަން ފީވަކުގެ ރައްޔިތުން ބަލައިގެންފައިވުމުން އެކަން ފާހަގަ ކުރައްވައި ޝުކުރު އަދާކުރައްވާފަ އެވެ.
މިބައްދަލުކުރެއްވުމުގައި، ފީވަކު ކައުންސިލުން ވަނީ، މިހާރު އެ ރަށުގެ ރައްޔިތުންނަށް އެންމެ ބޭނުންވެފައިވާ ކަންކަންވެސް ރައީސް އަށް ދަންނަވާފަ އެވެ.
އޭގެ ތެރޭގައި އެރަށުގައި މޫދަށް އެރޭނެ ސަރަހައްދެއް ނެތުމާ، ރަށް ގިރުމުގެ މައްސަލަ ހިމެނެ އެވެ.
