ޝޭހް އާދަމް ނިޝާން ސާޅީސް ފަސް ދުވަހު ބަންދުގައި ބެހެއްޓުމަށް ފަހު ދޫކޮށްލީ މި ދިޔަ ހަފްތާގެ އާދިއްތަ ދުވަހުއެވެ. ޝޭހް ދޫކޮށްލުމުން ޕްރޮސިކިއުޓަރ ޖެނެރަލްވަނީ އެ ނިންމުމާމެދު ހިތްހަމަ ނުޖެހިގެން އެ ނިންމުން ހައިކޯޓުގައި މިދިޔަ އަންގާރަ ދުވަހު އިސްތިއުނާފުކޮށްފައެވެ. އެހެންނަމަވެސް ހައިކޯޓުގެ ރަޖިސްޓްރާރ މަރްޔަމް ހޫރުޝިދާ ސޮއިކޮށް މިއަދުވަނީ ޕްރޮސިކިއުޓަރ ޖެނެރަލް ހުށަހެޅި މައްސަލަ ބޭރުކޮށްލާފައެވެ.
ޝޭހް ނިޝާން ޝަރުތުތަކަކާ އެކު ދޫކޮށްލުމުން އަލުން ބަންދުކުރުމަށް އެދި ދައުލަތުން ހައިކޯޓަށް މައްސަލަ ހުށަހެޅި އިރު ޝައިޚް ނިޝާން ހައްޔަރުކޮށްފައިވަނީ މިދިޔަ ޖޫން މަހު ގަލޮޅު ދަނޑުގައި ޔޯގާ ހަރަކާތެއް ހިންގަމުން ދަނިކޮށް އެތަނަށް ބަޔަކު ވަދެ ހިންގި ހަމަނުޖެހުންތަކާ ގުޅިގެން އެކަމަށް ހިތްވަރު ދިންކަމުގެ ތުހުމަތުކޮށެވެ. ނިޝާންގެ ބަންދުގެ މުއްދަތު އެކިފަހަރު މަތިން އިތުރު ކުރިއިރު ބަންދުގެ މުއްދަތުތައް އިތުރުކޮށްފައިވަނީ ރަނގަޅަށް ކަމަށް ހައިކޯޓުން ކަނޑައަޅާފައިވެއެވެ.
