މުލަކަތޮޅު ދަތުރުފުޅުގައި، ފުރަތަމަ އެ އަތޮޅު ރަތްމަންދޫއަށް ވަޑައިގަތުމަށްފަހު، ދެވަނައަށް ވަޑައިގަތީ މުލަކަށެވެ.
މުލަކަށް ވަޑައިގަތުމުންވެސް ރައްޔިތުންގެ ފަރާތުން ހޫނު މަރުހަބާއެއް ވަނީ ކިޔާފައެވެ. މަޑުއްވަރީގައި މީގެ ކުރީގެ އެއްވެސް ސަރުކާރަކުން ހިންގާފައި ނުވާހައި ގިނަ މަޝްރޫއުތަކެއް ރައީސް ސޯލިހުގެ ޒައާމަތުގައި ހިންގަމުންދާކަން، މަޑުއްވަރީ ކައުންސިލާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީ އާއިއެކު ރައީސް ބޭއްވި ބައްދަލުވުމުގައި ކައުންސިލުން ފާހަގަކުރިއެވެ.
ނަމަވެސް ހައްލު ބޭނުންވާ ގިނަ ކަންތައްތަކެއްވެސް މަޑުއްވަރީގައި ހުރިކަން ވެސް ކައުންސިލުން ފާހަގަކުރިއެވެ.
މިއަދު މެންދުރު ފަހު، އެރަށު ކައުންސިލް އިދާރާގައި އޮތް ބައްދަލުވުމުގައި ކައުންސިލުން ވަނީ، އެރަށަށް ދިމާވެފައިވާ މައްސަލަތަކާއި ހުރި ދަތިތަކާއި ގުޅޭ ގޮތުން ކައުންސިލުން ތައްޔާރުކޮށްފައިވާ ވީޑިއޯއެއް ދައްކާފަ އެވެ.
އެގޮތުން ފާހަގަކުރީ:
- މަޑުއްވަރީގެ ބަނދަރުގައި ނިވާކަމެއް ނެތުމުގެ ސަބަބުން ކުރިމަތިވާ ދަތިތައް
- ދެ މޫސުމަށް އުދައެރުން
- ރަށްގިރުން
- ކުނީގެ މައްސަލަ
- ޒުވާނުންގެ މަރުކަޒެއް ނެތުން
- ސްކޫލުގެ ޖާގައިގެ ދަތިކަން
މަޑުއްވަރީ ކައުންސިލާއިއެކު
ބަނދަރު ކުރެހުމާއިމެދު ރައްޔިތުން ހިތްހަމަނުޖެހޭތީ، މަސައްކަތް ނުފެށޭ
މިބައްދަލުވުމުގައި އެންމެ ބޮޑަށް މަޝްވަރާކުރެވުނީ، މަޑުއްވަރީގެ ބަނދަރާއި ގުޅޭ ގޮތުންނެވެ. އެގޮތުން މަޑުއްވަރީގަައި މިހާރު އޮތް ބަނދަރުގައި ނިވަލެއް ނެތްކަމާއި އާ ބަދަރެއް ބޭނުންވާކަމަށް ކައުންސިލުން ފާހަގަކުރިއިރު، އެ ބަނދަރުގެ ކުރެހުމާއިމެދު ރައްޔިތުންގެ މެދުގައި އޮތް ހިޔާލުތަފާތުވުންތަކުން މަސައްކަތް ކުރިއަކަށް ނުދެއެވެ.
މަސައްކަތް އޮތީ އެމްޓީސީސީ އާއި ހަވާލުކުރެވިފައެވެ. ނަމަވެސް، އެމަސައްކަތް ނުފެށި އޮތީ ބަނދަރުގެ ކުރެހުމާއި މެދު މަޑުއްވަރީގެ ރައްޔިތުންގެ މެދުގައި ހިޔާލުތަފާތުވުމުންނެވެ.
އެކަމާއި ގުޅޭ ގޮތުން ރައީސް ސޯލިހް ވިދާޅުވީ، މަޑުއްވަރީގެ ބަނދަރު ހެދޭނީ މަޑުއްވަރީގެ ރައްޔިތުންގެ ހިޔާލާއި މަޝްވަރާ އާއިއެކު ރައްޔިތުން ބޭނުންވާ ގޮތް އެކަމުގައި ހިމެނިގެން ކަމަށެވެ.
މަޑުއްވަރީގައި ރައްޔިތުންނާއި އެކު ރައީސް ބޭއްވި ބައްދަލުވުން
މަޑުއްވަރީގެ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކުރެއްވުމަށްފަހު، ރައީސުލްޖުމްހޫރިއްޔާ ވަނީ މަޑުއްވަރީގެ ރައްޔިތުންނާއި ވެސް ބައްދަލުކުރައްވާފަ އެވެ.
މުލަކަތޮޅުގެ ފަސް ރަށަށް މިއަދު ރައީސް ފެށްޓެވި ދަތުރުފުޅުގައި މިއަދު ހަވީރު ވަޑައިގަންނަވާނީ އެ އަތޮޅު ދިއްގަރަށެވެ.
