ޝަރުޢީ ދާއިރާއަށް 36 އަހަރަށް ވުރެ ގިނަ ދުވަހު ޚިދުމަތްކުރެއްވުމަށްފަހު ސިވިލް ކޯޓުގެ އިސްޤާޟީ އަލްއުސްތާޛު ޢަބްދުﷲ ޢަލީ ރިޓަޔަ ކުރެއްވިއިރު، ސިވިލް ކޯޓުގެ މުވައްޒަފުންނާ ބައްދަލު ކުރައްވާ ޢަބްދުﷲ ވިދާޅުވެފައިވަނީ ޚިދުމަތް ދިނުމުގައި ސިވިލް ކޯޓަކީ ނަމޫނާ ކޯޓެއްކަމުގައި ހެދުމަށް ވަސިއްޔަތް ކުރައްވާފައެވެ.
ބުރާސްފަތި ދުވަހަކީ ސިވިލް ކޯޓުގެ އިސްގާޒީ ޢަބްދުﷲ އަލީ، ސިވިލް ކޯޓުގައި މަސައްކަތް ކުރައްވާ ރަސްމީ ފަހު ދުވަހެވެ. އާދިއްތަ ދުވަހުން ފެށިގެން އިސްގާޒީ ރަސްމީކޮށް ރިޓަޔަ ވެގެންދާނެއެވެ.
"އުމުރުން 55 އަހަރުވުމުން އަމިއްލައަށް އެދިގެން ވަކިވާ ފަނޑިޔާރުންނަށާއި، 55 އަހަރު ނުވިނަމަވެސް އަމިއްލައަށް އެދިގެން ސިއްޙީ ސަބަބުތަކަށްޓަކައި މަޤާމުން މުސްކުޅިކުރާ ފަނޑިޔާރުންނަށް ޢިނާޔަތް ދިނުމުގައި އަމަލުކުރާނެ ގޮތުގެ ޤަވާޢިދު"ގެ ދަށުން ފަނޑިޔާރުކަމުގެ މަޤާމުން ޢަބްދުﷲ އަލީ މުސްކުޅިކޮށްދިނުމަށް، ޖޭއެސްސީން ނިންމީ އޮގަސްޓް މަހުގެ ފަހުކޮޅުއެވެ. ސިވިލް ކޯޓުގެ އިސްޤާޟީ އަލްއުސްތާޛު ޢަބްދުالله ޢަލީ، 2022 ސެޕްޓެންބަރު 04 އިން ފެށިގެން މުސްކުޅިކޮށްދެއްވުމަށް ނިންމުމާ ގުޅިގެން، ސިވިލް ކޯޓު ވަގުތީގޮތުން ހިންގެވުން، އެތާރީޚުން ފެށިގެން، ސިވިލް ކޯޓު ވަގުތީ ގޮތުން ހިންގާނީ ޤާޟީ އަލްއުސްތާޛު އަޙްމަދު ނިމާލް ޖުނައިދުއެވެ.
