މިނިސްޓްރީ އޮފް އިސްލާމިކް އެފެއަރޒްގެ މުވައްޒަފު، ރ. މަޑުއްވަރީ މަސްޖިދުލް އަމާނާގެ މުދިމު މުހައްމަދު މައުޖޫދު ވަޒީފާއިން ވަކިކޮށްފައިވަނީ މިދިޔަ އަހަރުގެ އޮގަސްޓް މަހުގެ 12 ވަނަ ދުވަހުއެވެ. އޭގެ ކުރިން، ދީނީ ގޮތުން ހަރުކަށި ފިކުރުގެ މީހުން މިރަށުގައި އުޅޭކަމަށްބުނެ ސަލާމަތީ ބާރުތަކުން 2019 ވަނަ އަހަރުގެ ފަހުކޮޅު މަޑުއްވަރީގައި ކުރިއަށް ގެންދިޔަ އޮޕަރޭޝަންގައި 2020 ވަނަ އަހަރުގެ ޖަނަވަރީ މަހުގެ ތެރޭގައި މައުޖޫދު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އޭނާ ބަންދުކޮށްފައިވަނީ ކުޑަކުދިންތަކެއް ލައްވާ ބަންގިގޮވާ ނަމާދުކުރުވައި، އެކުދިންނަށް ނަޞޭޙަތްދީ، ދީނީ އެއްބައިވަންތަކަން ނަގާލުމުގެ ތުހުމަތުގައި ކަމަށް އޭނާ ބުނެއެވެ.
ޓެރަރިޒަމަށް ހިއްވަރުދޭ ކަމަށް ތުހުމަތުކޮށް ފުލުހުން ބެލި މައްސަލައާ ގުޅިގެން އޭނާ މަގާމުން ވަކިކުރުމުން އޭނާ އަލުން އަނބުރައި ވަޒީފާ ހޯދުމަށް ކޯޓަށް ދިޔުމުން، ވަޒީފާއާބެހޭ ޓްރައިބިއުނަލުން އާދިއްތަ ދުވަހު ނިންމާފައިވަނީ އޭނާ ވަކިކޮށްފައިވަނީ އިޖުރާއީ އަދުލުވެރިކަން އަދި މައުލޫއީ އަދުލުވެރިކަންވެސް ގާއިމުނުކޮށް ކަމަށެވެ. އަދި އެހެންކަމުން އޭނާއަށް އަލުން ވަޒީފާދޭން ޓްރައިބިއުނަލުން އަމުރުކުރިއެވެ.
ޓެރަރިޒަމަށް ހިއްވަރުދޭ ކަމަށް ތުހުމަތުކޮށް މަޑުއްވަރީ މިސްކިތު މުދިމު މަގާމުން ވަކިކުރި މައްސަލައިގައި އެ ރަށު ކައުންސިލުންވަނީ އެންމެ ފުރަތަމަވެސް އެކަމާ ދެކޮޅު ހަދާފައެވެ. އަދި އެ ކައުންސިލުން އެންމެ ފުރަތަމަވެސް ގޮވާލާފައިވަނީ މައުޖޫދުގެ ވަޒީފާ އަލުން އިއާދަކޮށްދިނުމަށެވެ.
