ކުއްޔަށް ދޭ ތަންތަނުގެ އަގުތައް ބޮޑު މައްސަލަ އަކީ ޒަމާނުއްސުރެ ރާއްޖޭގައި ބޮޑުވެފައިވާ މައްސަލަ އެކެވެ. އަދި ވަކިން ހާއްސަކޮށް މާލޭގެ ކުލިތައް އަތް ނުފޯރާ ފަށުގައި ހުންނަ ކަމަށްބުނެ ގިނަ ބަޔަކު އަންނަނީ އަބަދުމެހެން އެކަމުގެ ޝަކުވާ އާއި ކަންބޮޑުވުން ފާޅު ކުރަމުންނެވެ.
"ސޯސަލް" އަށް މިނިސްޓަރު އަމީރު ދެއްވި އިންޓަވިއު އެއްގައި ވިދާޅުވީ، ގެދޮރު އިމާރާތް ކުރާ ފަރާތްތަކުން އެތަންތަން ކުއްޔަށް ދެމުން އަންނަ އަގު ކޮންޓްރޯލް ކުރުމަކީ ކުރެވޭނެ ކަމެއް ނޫން ކަމަށާއި، އެ ގެދޮރުތައް އިމާރާތް ކުރަނީ، ބޭންކުތަކުން ބޮޑެތި ލޯނުތައް ނަގައިގެން ކަމަށެވެ.
އެހެން ނަމަވެސް ކުލީގެ މައްސަލައަށް އޮތް ހައްލަކީ، ސޯޝަލް ހައުސިން ކަމަށާއި، ސޯޝަލް ހައުސިންގެ ތެރެއިން އެކަމަށް ހައްލު ލިބިގެން ދާނެ ކަމަށެވެ.
މިނިސްޓަރު އަމީރު އިތުރަށް ވިދާޅުވީ، މިހާރުވެސް ސޯޝަލް ހައުސިން ޔުނިޓުތައް ކުއްޔައް ދެމުން އަންނަނީ ސަރުކާރުގެ ބޮޑު ސަބްސިޑީއަކާއި އެކު ކަމަށެވެ.
މާލޭގެ ކުލި ކޮންޓްރޯލް ކުރުމަށް ގޮވާލާ، 2020 ވަނަ އަހަރުގެ ތެރޭ މަޖިލީހަށް ވަނީ ޕެޓިޝަނެއްވެސް ހުށަހަޅާފަ އެވެ. އެހެން ނަަމަވެސް ގެދޮރު އިމާރާތް ކުރުމަކީ، އަމިއްލަ ވިޔަފާރިތަކަށް ވާތީ ކުލި ކޮންޓްރޯލް ނުކުރެވޭނެ ކަމަށް މަޖިލީހުގެ ކޮމިޓީއިން ވަނީ ބުނެފަ އެވެ.
